“Sim horisehik iha Maubara Likisá, Komisaun A finaliza ona diskusaun espesialidade, e deputadu sira aprova ona e iha fulan oin sei tama ba finál globál atu votasaun”, dehan nia hafoin audénsia ho Prezidente Parlamentu Nasionál (PN), Aniceto Longuinhos Guterres Lopes iha PN, sesta (24/06).

Dadauk Parlamentu Nasionál halo alterasaun daruak ba estatutu PDHJ ne'e tanba uluk estabelesimentu estatutu ne'e seidauk iha Kódiku Penál.

Maibé agora iha ona Kódiku Penál, entaun tenke adjusta ho artigu sira iha Kódiku Penal liga ho krime sira, bainhira akontese karik prizaun tinan hira, ida-ne'e sei halo armonizasaun.

Nune'e PN sei altera tan artigu balun ne'ebé mak ko’alia kona-ba aplika multa, ne'ebé hahú husi tinan 2004 to'o gora PDHJ rasik la implementa tanba multa ne'e kompeténsia no desizaun husi Tribunál nian.

Tanba ne'e, artigu ne'ebé ko'alia kona-ba aplika multa ne'e sei muda filfali ba aplika koima, nune'e entidade balun mak la koopera ho PDHJ, sei aplika koima ba nia.

“Koima ne'e kestaun Administrativa se la koopera, la kumpre konvokatóriu nele fó koima, ne'e fasil liuba PDHJ para jere e se ema ne'e la kumpre koima mak nia foin ba krime dezelobidensia ba tribunál ne'e”, afirma nia.

Iha ne'e, PDHJ  konkorda projetu Lei númeru 39/V(4a)  kona-ba altera estatutu PDHJ tanba atu fasilita servisu di'ak liután presiza halo alterasaun tanba lei ne'e rasik kria kleur ona.

Maske iha tinan 2009 Parlamentu Nasionál halo ona alterasaun dahuluk ba estatutu ne'e maibé nia konteudu la muda, no iha momentu ne'ebá  hasai de'it kompeténsia liga ho Anti Korrupsaun nian ne’ebé atu ba hari’i fali Komisaun Anti Korrupsaun (KAK). (*)