“Ohin ha’u hanorin ba sira ita tau matan nafatin atu asegura nafatin atu sasán ne’ebé mak fahe ne’e to’o komunidade nia liman, nia pressu ne'e tenke razoavel sasán sira labele aat labele dodok, ita tenke trata ita-nia komunidade ho dignu tanba sira mós Timoroan, tanba sira presiza tebes ne'e mak ita ba fó”, dehan nia ba jornalista sira iha Salaun Federasaun Hanai Malu, Bairo Pite, sesta (24/06).

Ekipa distribuisaun ne’e labele atu kria tan problema iha programa sesta bázika maibé oinsá mak fahe lori sai povu husi sidadaun sira ne’ebé mak presiza tebes ba hahán sesta bázika nian ne’e rasik.

“Ita mak tun ba atu rezolve sira nia problema tanba sesta bázika ne’e buat ki’ik oan ida rezolve komunidade liga ba assuntu sira hanesan ne’e”, hatete nia.

Sekretáriu Estadu Kooperativa (SEKOOP), Elizário Ferreira, husu ba membru distribuidór sira katak tane kooperativa nia naran, hodi asegura instituisaun nia naran iha programa refere.

“Ba imi nafatin asegura imi-nia naran di’ak asegura insitituisaun SEKOOP nia naran di’ak e asegura Governu nia naran di’ak”, afirma nia.

Tanba iha distribuisaun sesta bázika ba etapa dahuluk, KAK konsege identifika iha kompaña barak mak la komprimenta ba lei distribuisaun nian, tanba ne’e mak presiza atu hadi’a hodi nune’e povu hakarak simu sesta bázika ho dignu.

Ba distribuisaun Sesta bázika sei akompaña direta husi Prokuradoria Direitu Umanu no Justisa, no Komisaun Anti Korrupsaun inklui ekipa sira seluk to'o remata. (*)