“Ohin dadersan madrugada mais menus tuku 06:00 ita hetan informasaun husi komunidade sira kona-ba ema lori mina rai ilegál tama iha kapitál Dili, entaun ita-nia parte komunidade informa ba ita-nia postu tránzitu, nune’e mak Postu Tránsitu ne’e informa kedas mai iha Delta Bus sentru komandu Munisípiu Dili nian, entaun sentru Delta Bus informa kedas ba patrolla Dom Aleixo nia hodi ba fatin ne’ebé mak identifika katak ema lori sasán ilegál tama”, dehan Komadante Polísia Nasionál Timor Leste (PNTL) Munisípiu Dili, Superintendente Xefe Henrique da Costa, iha Kaikoli, sesta (24/06).
Bainhira ekipa patrollamentu hosi eskuadra Dom Aleixo to’o fatin refere, hetan duni karreta truk ho sapa matríkula 57.971 ne’ebé mak tula mina rai hamutuk jerigén 103 ho bidon ida.
Nune'e prosesu apreensaun ne’e, PNTL identifika ema na’in-tolu kompostu husi mane nain-rua (2) no feto-ida (1) ho naran inisiál JGN, AdS, nu’udár uma-na’in, no sidadaun JF, hanesan kondutór kamioneta.
Sidadaun sira ne’e, PNTL suspeita nu’udár autór ne’ebé mak durante hala’o atividade negósiu mina-rai, ne’ebé mak hatama ho ilegálmente husi fronteira rai-maran no tasi, hodi mai fa’an iha kapitál Dili.
Entretantu evidénsia sira hanesan mina-rai ho kuantidade jerígen 103, mina-rai iha bidón ida (1), inklui karreta kamioneta ida tula sasán ne'e PNTL asegura ona iha Eskuadra Dom Aleixo. (*)