“Kuandu sasán sai husi Alfándega ne'e sasán sira ne’ebé moos ona ne'e mak mai to’o iha ami-nia fatin infelizmente sasán sira ne’ebé to’o iha ami-nia fatin laloos agora iha atu presiza ko’alia ho alfándega tanba saida mak sasán hasai mai ne’e la chek uluk ami-nian loos ona ka la’e no kompaña nian loos ona ka la’e, ne’e ita filafali ba alfándega ne’ebé mak release sasán sira husi kontentór husi Alfándega”, dehan Ministra Odete ba jornalista sira iha SAMES, Kampung Alor, tersa (14/06).

Maibé, kona-ba kompaña ne’ebé mak sai responsável ne’e hodi transporta ai-moruk ne’e Ministériu Saúde entrega SIKN nia liman hodi halo prosesu investigasaun.

“Parte ba SIK nian depende ba sira-nia lala'ok oinsá atu fó sansaun ba kompaña ne’ebé mak halo falsifikasaun dokumentu ne’e kabe ba SIKN ninia responsabilidade”, hatete nia.

Tanba ai-moruk item lima ne’ebé mak Governu halo pedidu atu transporta mak ne’e laiha maibé iha item seluk ne’ebé mak kompaña haruka mai.

Tamba ne’e, hamosu deskonfia husi públiku katak ai-moruk ida importante ba Ospitál Governu nian presiza, kompaña la tau ba prioridade maibé tenta halo dokumentu falsu hodi bele ba fa'an iha sira nia klínika privadu ruma.

Realidade ne’ebé mak iha liliu Ospitál Nasionál Guidu Valadares dala barak laiha ai-moruk maibé fó de’it reseita ba pasiénte sira hodi ba sosa ai-moruk ne’ebé mak importante ba ema nia vida umana.

“Ai-moruk kompletu maibé iha item neen hanesan ne’e mak iha kontratu iha maibé kompaña rasik la rejista ou la halo ninia fatura no la halo ninia dokumentu manifes ba ami entaun ne’e responsabilidade kompaña nian”, deklara nia.

Tanba ai-moruk sira ne’ebé mak tama mai mak laiha dokumentu bele afeita kedas ba kualidade ai-moruk sira ne’ebé mak kompaña sira importa mai.

“Se sasán sira ne’e mak tama mai laiha dadus, laiha identidade ne’e falsifikasaun tanba dokumentu laiha ne'e liga kedas ba kualidade ai-moruk nian ne’e impaktu ba ita”, argumenta nia.

Kona-ba kompaña ne’ebé mak transporta Ai-moruk mai ne'e parte husi ofisiál Diresaun Nasionál Farmasia Medikamentus, Octavio Fernandes hatete, iha diresaun lisensiamentu ne’ebé mak sei responsável hodi haree ba kazu sira ne'e.

“Ne’e ha’u labele ko'alia ba imi tanba iha Gabinete lisensiamentu ne'e iha ita-boot sira (jornalista) ba ne’ebá de’it, maibé ba parte Clearence nian ami-nia parte ami sei fó sansaun”, dehan nia.

Tanba Diresaun Nasionál Farmasia Medikamentus sei iha Gabiente inspesaun ne’ebé mak iha ne’ebé sira sei aprezenta problema ne’e ba sira.

Durante ne’e, Kompaña Klínika Moris Foun mak manán konkursu públiku hodi haruka Ai-moruk mai Timor-Leste.

Maibé lista item lima ne’ebé mak Governu hato’o pedidu ba Kompaña Klínika Moris Foun atu haruka mai mak hanesan, APD Antacid Suspension ho nia kualidade hamutuk 5000 Manufacturer Accent PD husi nasaun Índia maibé laiha lista ai-moruk ne’ebé importa ona mai Timor-Leste

Alende ne’e, iha item seluk ne’ebé mak laiha mak hanesan, Paracent Suspension, PHS Colik Tab Azicent tab maibé iha item ida de’it mak iha lista ka dokumentu mak APD Amclav tab.

Nune’e mós Kompaña Klínika Moris Foun mós halo mudansa pedidu Clearence ba Aimoruk sira ne’ebé importa mak iha Timor-Leste. (*)