“Ohin, ha’u promulga lei kona-ba Planu Opsaun Boot sira ba tinan 2023”, dehan PR Horta liuhusi Komunikadu Imprensa ne'ebé www.tempotimor.com asesu husi gabinete Prezidente Repúblika, segunda (13/06).
Tanba Prezidente Repúblika haree katak Lei ida-ne’e nu’udar planu indikativu ba prioridade sira Governu atuál nian no orsamentu respetivu ba projesaun sira hanesan ne’e, aplikasaun ba lei ne’e sei hahú iha tinan 2023, siknifika sei laiha impaktu imediatu ba estabilidade finanseira atuál ba rai-laran.
Aleinde planu ne'e koreponde mós ba objetivu sira hodi alkansa programa sira ne'ebe estabelese iha Planu Estratéjiku ba Dezenvolvimentu Nasionál tinan 2011-2030 no depende ba prioridade sira ba Governu ruma iha futuru, planu ida-ne’e bele hetan alterasaun iha kualker tempu atu refleta prioridade sira-ne’ebé hanesan ne’e.
Ho promulgasaun ne’e, funsaun Governu nian atu estabelese polítika no Prezidente Repúblika bele fó konsellu ba Governu no hato’o opiniaun sira, públiku ka privadu, kona-ba polítika saida de’it iha domíniu públiku, maibé Parlamentu no Governu nia kna’ar mak atu dezenvolve no implementa polítika públika sira iha sistema demokrátika.
Prezidente iha kna’ar atu atua nu’udar mahein ida ba Konstituisaun, nu’udar protetór ba demokrásia nomós ba Estadu Direitu, no atu asegura tuir limitasaun sira lei nian, respeitu no kumprimentu ba regra konstitusionál sira. (*)