Print this page

Kazu Abuzu Poder, CNRT 'Deskonfia' Ema Balun Tenta Estraga Deputadu Arão

Xefe Bankada Congresso Nacional de Reconstrução de Timor (CNRT), Duarte Nunes. Xefe Bankada Congresso Nacional de Reconstrução de Timor (CNRT), Duarte Nunes. Foto Suplay

Tempotimor (Dili)-Xefe Bankada Congresso Nacional de Reconstrução de Timor (CNRT), Duarte Nunes, deskonfia ema balun tenta atu estraga deputadu Arão Noe Amaral ba kazu abuzu poder ne'ebe mak akontese wainhira nia sei asume hela pasta Prezidente Parlamentu Nasionál (PN).

“Bankada CNRT nia haree ba eis prezidente parlamentu ne’ebe mak Ministeiru Públiku notifika ona ba kazu tratamentu iha Singapura, ne’e horeseik ami mós iha enkontru ida ha’u hanoin nia esplika ona, e ami haree iha intensaun husi boot sira atu estraga ema nia pozisaun nomós iha intensaun atu haketak partidu”, dehan nia iha PN, kuarta (01/06).

Bankada CNRT nota kazu ne'e iha ligasaun oituan ho ema balun nia interese atubele estraga ema nia pozisaun inklui haketak nia husi Partidu tanba kazu ne'e foin mak iha faze inkeritu husi Ministériu Públiku maibé sira hahú husu ona pedidu ba Parlamentu Nasionál atu hasai imunidade.

Tuir lei, Ministériu Públiku nunka husu atu hasai imunidade tanba prosesu ne'e sei inkeritu hela no wainhira tama ona julgamento mak foin tribunál husu ba PN atu hasai imunidade.

“Agora sei iha Ministériu Públiku, se nia la ba mós sira bele buka dadus husi fatin seluk hodi hatene, agora sira la’e, husu fali hasai imuniadade para depois diskusaun ne’e buat ida ba tiha komisaun ami-nia kolega sira protesta no sira hato’o filafali karta ba Ministériu Públiku”, afirma nia.

Dadauk deputadu Arão Noe Amaral mós prontu ona atu kolabora ho justisa maibé loron atu ba halo esplikasaun mak seidauk fiksu.

“Ho ida ne’e mak halo pedidu mai prezidente hatun ba komisaun no komisaun fó resposta ona katak Ministériu Públiku la bele husu pedidu no hasai pedidu para hasai imunidade ema nian ne’ebé haruka filafali ona ba agora hein de’it iha ne’ebé notifika mai para nia ba hatan”, dehan nia.

Tuir informasaun katak kazu ne'e akontese wainhira Eis Prezidente Parlamentu Nasionál, Arão Noe Amaral ba hala'o tratamentu iha nasaun Singapura.

Iha momentu ne'eba Prezidente Arão Noe Amaral ba nasaun seluk, maibé nia fila mak nia moras ho ida ne'e nia ba liu iha Sigapura hodi halo tratamentu.

Tanba ne'e, CNRT haree katak dala ruma ida ne’e mak halo ema balun hare’e ladun apropriadu nune'e sira hakarak loke investigasaun ba ida ne'e.

“Tanba nia sai ba servisu mai aproveita ba kedas Singapura tanba problema fuan ou kleur ona entaun nia aproveita ba chekup iha ne’eba. Mas prontu ne’e prosesu ida ke nia sei ba esplika mas prosesu no situasaun mak ne’e Ministériu Públiku husu fali hasai imunidade kuandu ne’e la’ós kompeténsia Ministériu Públiku nian”, dehan nia. (*)

Rate this item
(0 votes)
Last modified on Wednesday, 01 June 2022 18:15
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items