Print this page

Lú Olo Sei Haree Lei Responsabilidade Prezidente Repúblika

Prezidente Repúblika (PR), Francisco Guterres ‘Lú Olo’. Prezidente Repúblika (PR), Francisco Guterres ‘Lú Olo’. Foto Suplay

Tempotimor (Dili)-Prezidente Repúblika (PR), Francisco Guterres ‘Lú Olo’ hatete, nia parte sei haree no estuda lei númeru 42/V (4a) kona-ba responsabilidade Prezidente Repúblika (PR) ne'ebé aprezenta husi Parlamentu Nasionál (PN).

“Bom ha'u iha horseik ne'e ba tiha semináriu seluk pois sira aprova, parese ke sira haruka ona ba ha'u-nia gabinete, ha'u seidauk haree, e agora mak ha’u ba haree”, hatete Lú Olo iha salaun Ministáriu Finansa, tersa (17/05).

Tanba iha loron 16 maiu 2022, Parlamentu Nasionál aprova ona projetu lei númeru 42/V (4a)- kona-ba Responsabilidade Prezidente Repúblika iha finál globál ho votu a-favór 35, kontra 24 no abstensaun 0.

Husi Projetu lei ne’e iha artigu hamutuk 30, hahú husi Kapítulu I Dispozisaun Jerál ho nia artigu rua, Kapítulu II Tramitasaun Prosedimentu Komun ho artigu hitu, Kapítulu III Krime Kometidu iha exersísiu funsaun Prezidente Repúblika, Sesaun I Dispozisaun Jerál ho artigu tolu.

Iha sesaun II Dispozisaun Penál Espesiál ho artigu 10, Sesaun III Dispozisaun Espesiál Prosesu Penál ho artigu tolu, Kapítulu III Violasaun Klara no Grave Obrigasaun Konstituisional ho artigu haat no Kapítulu V Dispozisaun Finál ho artigu rua.

Enkuantu Projetu lei ne'e rasik asina husi Deputadu Fretilin, Joaquim dos Santos, Deputadu PLP, Francisco de Vasconselos no Deputadu KHUNTO, Luís Roberto. (*)

Rate this item
(1 Vote)
Last modified on Wednesday, 18 May 2022 02:28
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items