“Tribunál Rekursu deside no proklama rezultadu eleisaun segunda volta ne’ebé halo iha loron 19 marsu. Kandidatu Prezidente Repúblika ho númeru sorteiu ida, José Ramos Horta mak sai vensedór ba eleisaun no Prezidente eleitu 2022-2027”, dehan Deolindo iha sala audénsia Tribunál Rekursu, Caicoli, sesta (29/4).
Durante iha prosesu verifikasaun no validasaun ba akta apuramentu husi eleisaun prezidensiál segunda volta, Tribunál la identifika irregularidade.
Tanba ne’e Tribunál Rrekursu deklara no proklama ba públiku katak kandidatu Prezidente Repúblika, José Ramos Horta mak sei sai Prezidente ba RDTL.
Ba apuramentu eleisaun prezidensiál segunda volta ne’e, Tribunál Rekursu simu iha loron kinta (28/04) hodi verifika no halo validasaun ba dokumentu ne’e.
Iha prosesu validasaun ne'e, Kandidatu Prezidente Repúblika, Francisco Guterres ‘Lú Olo’, hetan votu hamutuk 242. 239 ne'ebé reprezenta pursentu hamutuk 37,9%.
Ba rezultadu eleisaun ne'e, Tribunál Rekursu hakarak fó kongratulasaun ba Sekretariadu Tékniku Administrasaun Eleitorál (STAE) no Komisaun Nasional ba Eleisaun sira (CNE), observadór internasionál husi Uniaun Europeia, seguransa PNTL, F-FDTL, autoridade komunitáriu no povu ne'e fó kontribuisaun ba realizasaun festa demokrásia. (*)