Print this page

Lei Mígrasaun 'Bandu' Kompaña Emprega Turista iha Timor-Leste

Komandante Jerál Polísia Nasionál Timor-Leste (PNTL), Komisiáriu Faustino da Costa. Komandante Jerál Polísia Nasionál Timor-Leste (PNTL), Komisiáriu Faustino da Costa. Foto Suplay

Tempotimor (Dili)-Komandante Jerál Polísia Nasionál Timor-Leste (PNTL), Komisiáriu Faustino da Costa hatete, lei Migrasaun no aziliu bandu kompaña sira emprega sidadaun estranjeiru ne’ebé utiliza viza turista mai halo iha Timor-Leste.

“Agora se nia mai hanesan turista depois ema ne'e ikus fali mai halo servisu ne'e ha'u hanoin ita-nia lei migrasaun ne'e iha ne'eba hatete kedas, se nia mai hanesan ema turista depois nia halo servisu, kompaña ne'ebé emprega sei mós hetan multa hanesan mós ema ne'e rasik, ne'ebé ita-nia lei mak hatete hanesan ne'e”, esplika Komisiáriu Faustino iha Palásiu Prezidensiál, Bairopite, kinta (28/04).

Maske ema hotu livre mai vizita Timor-Leste, maibé sira laiha diretu atu hala'o servisu iha rai laran tanba sira-nia estatutu ne'e hsnesan ema turista.

“Ha’u lakohi atu mais detallu dala ida tan katak, Diresaun Jerál Servisu Migrasaun ninian. Agora saida mak ha’u-nia observasaun iha ne'e ba ita hotu tantu mós públiku, buat ida ke importante ita tenke tau, ita iha kultura no tradisaun”, hatete nia.

Tanba iha kazu anterior balun kompaña konstrusaun sivíl sira, dala barak uza liu ema rai liur tanba situasaun ida dehan katak sei la tau traballadór timoroan tanba haree ba hahalok.

“Barak gosta konta istória, gosta fuma mak barak, haree kolega ida mai hase. Tanba ne'e mak uluk iha kazu balun ke pasadu PNTL mós halo investigasaun, entaun kompaña sira dehan hanesan ne'e, agora se ami lori ema husi Tailándia, Filipina, Vietname, aleinde kualidade servisu maibé mós sira foku duni ba hala'o servisu”, dehan nia.

Nune'e, hakarak fó mensajen ba ema hotu no kompaña sira atubele uza timoroan sira, tanba Governu liuhusi Sekretáriu Estadu ba Formasaun Profesionál no Empregu (SEFOPE) halo formasaun ba timoroan sira iha sentru formasaun lubuk ida hodi prepara ba servisu.

 

"Uza ita-nia ema sira ne'e, kuandu iha ona servisu ita-boot sira aproveita, tanba se la’e ema seluk bele aproveita fali situasaun ida ne'e”, afirma nia. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items