“Projetu Proposta Rezolusaun haat ne’e ba Parlamentu Nasionál, kona-ba Tribunál Penál Internasionál no ba Tribunál Direitu Tasi nian”, dehan Ministru Prezidénsia Konsellu Ministru, Fidelis Manuel Leite Magalhães, iha Palásiu Governu, kuarta (27/04).
Projetu Proposta Rezolusaun ba Parlamentu Nasionál atu ratifika adezaun ba alterasaun ba artigu 124 Estatutu Roma husi Tribunál Penál Internasionál, ne’ebé adota iha Haia, Olanda iha loron 26 novembru 2015.
Nune'e mós ratifika adezaun ba alterasaun ba artigu 8 no alterasaun sira-seluk ba estatutu Roma husi Tribunál Penál Internasionál relasiona ho krime agresaun, ne’ebé adota ona iha Konferénsia Revizaun nian iha Kampala, iha loron 31 fulan-maiu to’o loron 11 fulan-juñu 2010.
Alende ne'e mós ratifika adezaun ba akordu kona-ba priviléjiu no imunidade husi Tribunál Penál Internasionál, ne’ebé halo iha Nova Iorke, iha loron 9 fulan-setembru tinan 2002, inklui ratifika adezaun ba Akordu kona-ba priviléjiu no imunidade husi Tribunál Direitu Tasi nian, ne’ebé adota iha loron 23 fulan-maiu tinan 1997. (*)
