Kazu ne’e, akontese iha loron 19 fulan-abril tinan-2022 iha sentru votasaun Suku Maluru, Postu Adminisitrativu Kelikai, bainhira sidadaun na'in-2 ho kondisaun lanu tenta halo perturbasaun ba votasaun.
Momentu ne’e, Polísia Nasionál Timor-Leste (PNTL) Munísipiu Baukau, evakua kedas suspeitu na'in-2 hodi detein iha sela durante oras 72 hafoin submete ba primeiru interogatóriu iha Tribunál Distritál Baukau.
“Ohin desizaun ona, iha desizaun ne’e, Tribunál aplika pena multa ba arguidu na’in-rua hanesan multa loron-30 fixa kada loron-ida 50 sentavós hosi tótal multa $15 ba kada arguidu ho pena alternativa loron-20 prizaun,” dehan defensór públiku Sidonio Manuel Sarmento iha vila nova, sesta (22/04).
Tanba, kazu ne’e, rejista iha Tribunál Distritál Baukau ho númeru nuc 0023/22.BCSIC, loron 21 abríl 2022 ho tipu krime perturbasaun ba aktu eleitóral ne’ebé previstu kodegu penál númeru Artigu da-235 iha pontu dahuluk kona-ba sé mak liuhusi kualkér meiu, perturba funsionamentu asembleia votu nian, sei kondena ho pena prizaun to’o tinan 1 ka multa.
Prosesu julgamentu prezide husi juis singular, José Escorial, Ministéiru Públiku reprezenta husi prokuradór, Julio da Silva Correia no arguidu na’in-rua hetan asistensia legál husi defensór públiku Sidonio Manuel Sarmento. (*)
