Tuir komunikadu imprensa ne’ebé fo sai iha loron (12/04) katak, deklarasaun ne’e kobre husi instituisaun estadu sira tantu instituisaun públiku direta no autonomo sira husi kargu diretor jerál sira to’o nível kargu xefe departamentu no funsionáriu ka ajente públiku sira ne’ebé aprovizionamentu no kontratasaun públiku.

Desde Prezidente Repúblika promulga lei ne’e iha 26 Agostu 2020 no tama iha vigór iha 22 fevereriu 2021, KAK halo ona ezersiu no eforsu oioin hodi implementa provizaun sira iha lei ne’e, partikularmente relasiona DRBI tuir espiritu lei ne’e.

Iha ámbitu implementasaun lei refere, KAK inisia no dezenvolve ona formuláriu arollamentu nian, halo arollamentu ba instituisaun sira ne’ebé sujeita ba rejime deklarasaun rikusoin nian, sensibiliza lei refere ba ajénte públiku sira iha munsipiu 12, minus RAEOA no Ataúru.

Aleinde ne’e halo servisu no kordenasaun ativu hamutuk ho Tribunál Rekursu no Teknolojia Informasaun no Komunikasaun (TIC Timor, IP) hodi dezenvolve Sistema formuláriu Plataforma online DRBI nian, halo esplikasaun Sistema Plataforma online DRBI ba instituisaun sira ne’ebé presta sira-nia deklarasaun no kontinua envia no simu formuláriu deklarante sira-nia deklarasaun rikusoin mai KAK.

KAK mós hakarak aktualiza dadus no informasaun detallu kona-ba progresu servisu ekipa deklarasaun rendimentu, bens no interese (DRBI) nian hanesan Dezenvolve formuláriu rua ne’ebé KAK konsege dezenvolve ona formuláriu arollamentu kompostu husi formuláriu arolamentu nível kargu xefia sira no formuláriu arolamentu ba funsionáriu afetu sira ne’ebé temi iha aliñea u, v, x, y, z no aa husi artigu 29, lei MPKK nian.

Iha ne’e, KAK mós dezenvolve ona formuláriu deklarasaun rendimentu, bens no interese (DRBI) nian ho Plataforma online ne’ebé hetan asisténsia tékniku husi TIC Timor IP.

Ámbitu Sensibilizasaun Lei MPKK ninian, KAK konsege sensibiliza ona lei refere ba instituisaun direta no indireta sira kuaze hamutuk atus-ida-resin (100 e tál) ho totál partisipante sira hamutuk 2.002 iha munisípiu 12.

Ba detallu partisipante sira ne’ebé partisipa iha sensibilizasaun ne’e mak hanesan SEII iha 21, Timor GAP 102, Prezidénsia Repúblika 45, Responsavel rekursu umanu nível ministériu sira 284, MOP 186, MNEK 50, SEJD 51, MTKI 80, MESK 123, IJE 59, INS 65, Munisípiu Lautein 106, Munisípiu Baukau 95, Munisípiu Vikeké 77, Munisípiu Ainaro 81, Munisípiu Covalima 103, Munisípiu Bobonaro 44, Munisípiu Aileu 96, Munisípiu Manatutu 83, CCITL 60, no Ministériu Asuntu Kombatente 150.

Iha Rejistu Deklarante no agregadu família mak bazeia dadus arolamentu KAK nian to’o fulan-setembru 2021, KAK arola ona funsionáriu sira ne’ebé hakna’ar-an iha insitituisaun estadu (direita no indireta) nian hamutuk atus-ida-rua (102).

Iha ne’e KAK konsege resjitu ajente sira ne’ebé sei sujeitu ba presta deklarasaun tuir Lei refere hamutuk 5.015, agredau familia hamutuk 17.750, Maibé númeru hirak ne’e sei posivel aumenta iha futuru.

Iha esplikasaun Sistema Plataforma online DRBI ba instituisaun sira hamutuk 26. Tanba nbe’e, instituisaun sira ne’ebé KAK envia ona formuláriu deklarasaun nian hamutuk tolunulu-resin-rua (32) hanesan kargu diresaun no xefia sira iha Prezidénsia Repúblika, Parlamentu Nasionál, MPKM, MAPKOMS, MAKLAM, Trade Investment, INCT, IJE, INSS, FDCH, HIV-SIDA, Arquivu no Museum, APORTIL, SERVE-IP, ANC, MPM, MTK, MOP, RTTL-EP, Institutu Bambo, ANAA, MD, BEE TL-EP, EDTL-EP, MPO, ANATL-EP, SEFOPE, IJT, PDHJ, TATOLI-IP, MESSK no AIFAESA-IP.

Deklarante sira ne’ebé notifikadu atu aprezenta formuláriu deklarasaun nian hamutuk atus-sia-ualunulu-resin-lima (985), no sira ne’ebé submete ona hamutuk 392 deklarante husi kargu diresaun no xefia sira hamutuk atus-rua-tolunulu-resin-rua (232).

Ho ida ne’e, KAK hakarak informa ba públiku katak, KAK dadaun ne’e kontinua atende deklarante sira-nia deklarasaun liuhusi esplikasaun Sistema Plataforma online nian ba instituisaun sira ne’ebé sujeita ba deklarasaun nian.

KAK mós kontinua atende no fó asisténsia tékniku ba deklarante sira iha edifísiu KAK iha Vilaverde kona-ba difikuldade ne’ebé deklarante sira hasoru iha Sistema online refere hodi deklara sira-nia rikusoin.

Ekipa KAK ne’ebé responsável ba servisu rejista no verifika deklarasaun rendimentu bens no interese ne’e sei kontinua disponivel no prontu kualker tempu iha oras servisu nian atu fasilita deklarante sira priense sira-nia riku-soin tuir lei haruka. (*)