Print this page

Komandu PNTL Seidauk Simu Keixa Sirkulasaun Osan Falsu

Xefe Departamentu Relasaun Públiku PNTL, Superintendente Xefe Armando Monteiro. Xefe Departamentu Relasaun Públiku PNTL, Superintendente Xefe Armando Monteiro. Foto Suplay

Tempotimor (Dili)-Komandu Polísia Nasionál Timor-Leste (PNTL) to'o oras ne'e seidauk simu keixa husi Pedro Carascalão kona-ba sirkulasaun osan falsu ne’ebé publika iha Mídia sosiál (facebook).

“PNTL servisu bazeia ba provaz, evidensia tenke mai iha PNTL hodi nune'e ita bele buka hamutuk ho ema ida ne'ebé publika informasaun refere, agora nia espouse de'it iha mídia sosiál, soe fatuk subar liman hodi nune'e buka reasaun públiku”, dehan Xefe Departamentu Relasaun Públiku PNTL, Superintendente Xefe Armando Monteiro, iha Kuartel Jerál PNTL, Kaikoli, segunda (11/04).

Maske antes ne'e, iha mídia sosiál (facebook) liuhusi ho Identidate Pedro Carascalão publika informasaun kona-ba sirkulasaun osan falsu, maibé PNTL rasik seidauk seidauk simu keixa ruma husi sidadaun sira.

Bainhira iha keixa, Komandu sei buka no halo atuasaun bazeia ba prosedementu legál ne'ebé mak iha, maibé tanba seidauk iha sidadaun ida ne’ebé hato’o keixa.

Bainhira Superintendente Xefe Armando sei lidera Komandu PNTL Munisípiu Dili iha tinan 2019, kazu hanesan ne'e akontese, maibé sira konsege halo apreensaun osan falsu no kaptura ona autór sira ne'ebé sirkula osan falsu refere.

Maske seidauk iha keixa husi sidadaun ruma, maibé PNTL buka tuir nafatin autór sira ne'ebé mak sei espalla hela atividade refere.

“Ita seidauk simu keixa, maibé PNTL konsideira, saida de'it mak opiniaun públiku konstrutivu ba ita-nian komunidade, no nasaun PNTL mós buka tuir”, afirma nia.

Komandu Jerál PNTL sei alerta ba Komandu munisípiu 13, no servisu informasaun polísia, no servisu investigasaun kriminál hodi bele buka tuir osan falsu ne’ebé espalla iha sosiadade nian leet.

Nune’e husu ba komunidade sira bainhira deskonfia osan falsu ruma bele besik ba Banku Sentrál Timor-Leste atubele hatene orijin lolos husi osan refere. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items