Kazu akontese ne’e akontese Suku Fahilebu, Postu Administrativu Bazartete, maizumenus 9:30 oras timor-leste (otl), suspeitu AF bainhira partisipa servisu ba preparasaun simu vizita illas São João de Brito iha sira-nia suku.
“Bainhira suspeitu to’o fatin hodi kaer servisu hamos duut, mak mosu goza malu halimar no vítima na’in-rua hamnasa, suspeitu hanoin hamnasa ba nia, entaun derepente, suspeitu AF foti katana hodi taa vítima Francisco dos Santo ho Edito Soares iha kakorok nune’e vítima na’in-rua mate kedan iha fatin”, esplika Superintendente Xefe Armando Monteiro ba jornalista sira iha Kuartel Jerál PNTL, Kaikoli, sesta (08/04).
Hafoin akontesimentu, suspeitu AF halai lakon husi fatin akontesimentu, maibé liu tiha oras balun, Komandu PNTL Munisípiu Likisá, liuhusi Polisia Eskuadra Bazatete, halo kedan kapturasaun ba suspeitu, hodi detein kedan iha sela detensaun komandu PNTL Munisípiu Likisá.
“Suspeitu AF rasik, dadaun ne’e detein ona iha sela Komandu PNTL Munisípiu Likisá, hodi halo hela investigasaun ba nia, no investigasaun kuaze konklui ona, ohin tuku 14:00 Komandu PNTL Likisá sei lori suspeitu AF hodi submete ba Primeiru Interogatóriu iha Tribunal Distritál Dili (TDD)”, dehan nia.
Tuir relatóriu investigasaun ne’ebé mak Komandu PNTL Munisípiu Likisá, relata ba Komandu Jerál PNTL ne’e katak, Autoridade Lokál no ema sira iha fatin akontesimentu dehan durante ne’e suspeitu ne’e ema ne’ebé normal.
Hafoin akontesimentu Komandu PNTL Likisá konsege transporta kedan mate isin na’in-rua ne’e ba Dili, hodi halo prosesu autopsia iha Hospital Nasional Guidu Valadares (HNGV). (*)
