Tempotimor (Dili)-Akontesimentu kazu omésidu (taa malu) ne'ebé mak akontese iha Suku Fahilebo, Postu Administrativu Bazartete, Munisípiu Likisá, loron kinta (07/04), rezulta vítima Edito Soares no Francisco dos Santos mate fatin, no autór ba kazu ne’e halai lakon.
Tuir informasaun ne'ebé www.tempotimor.com reklla husi membru Polísia Nasionál Timor-Leste (PNTL) iha munisípiu Likisá katak ne’ebé lakohi atu públika nia identidade informa, kazu ne'e akontese duni iha Suku Failebo, kuaze tuku 10 ho balun, ne'ebe hamate vítima na'in-rua.
"Kazu taa malu foin dadauk ne'e ka, ne'e akontese iha Suku Fahilebu, autór mak halai lakon. Akontese iha sa oras ne'e mak ha'u ladun hatene, maibé sé di'ak liu konfirma mak Komandu Munisípiu Likisá nian, para hetan informasaun klaru liután”, dehan nia ba www.tempotimor.com liuhusi telefone, kinta (07/04).
Ba kazu ne'e, www.tempotimor.com rasik koko konfirma ona parte Komandu Polísia Nasionál Timor-Leste (PNTL) Munisípiu Likisá, maibé labele atende tanba sei kopuadu ho servisu seguransa nian iha terenu. (*)
