Reprezentante Funsionáriu Kontratadu Saneamente, Arina Amaral hatete, sira-nia servisu ne’e la'ós servisu iha fatin ne’ebé di’ak hanesan funsionáriu sira seluk, maibé servisu iha lixu, raut foer sira iha valeta.

“Ami hakarak hatene problema ne’e iha ne’ebé mak hasai ami, depois mai servisu ne’e la'ós ami tur iha kantor, ami ne’e servisu iha raut ema nia tee, mi, karau manu animal sira ne’ebé mak mate iha valeta kuak sira ne’e”, dehan Arina hafoin hasoru malu ho Komisaun A, iha Parlamentu Nasionál, kuarta (06/04).

Bainhira Administrasaun Postu hasai funsionáriu seneamentu hirak ne’e, laiha ona fatin atubele kontinua servisu, tanba dadaun ne’e situasaun ne’ebé la permite no laiha oportunidade atubele servisu iha fatin seluk.

“Hasai tiha ami, ami ho idade ida ne’e hanesan ami atu ba servisu tán iha ne’ebé no se mak simu tan ami atu servisu, maske saláriu ki’ik $115 ami lori ida ne’e hodi haree oan sira-nia eskola, maibé Governu mós la haree liuba mai nia moris”, katak nia.

Tanba servisu ne’ebé durante ne’e halo ho saláriu $115 ne’e sira la halo buat ida tau halo netik uma mós lato’o, hahú husi tinan 2015 to’o ohin loron sira moris ho saláriu $115 la halo uma ida so ba hola nesesesidade báziku de’it lato’o hasai tan.

“Ami husu ba Governu se bele karik loke fali servisu ba ami, se para tiha ami-nia servisu ami hodi saida mak hare’e ba oan ami-nia eskola, se karik Governu iha hanoin, Governu laiha hanoin entaun tau tali iha mai ha'u-nia kakorok, tanba ami ne’e sidadaun Timor ami presiza servisu”, dekalara nia.

Prezidente Komisaun A trata asuntus Konstituisuan no Justisa, Joaquim dos Santos hatete, Postu Adminitrativu Kristu Rei hapara Funsionáriu sira-nia kontratu tanba sira-nia kontratu mak remata, tanba ne'e Komisaun A sei enkamiña ba Ministériu relevante.

“Trabalhadór kontratadu husi Munisípiu Díli nian kona-ba sira-nia servisu, husi 2015 ba kontratu servisu durasaun tempu fulan 10 mais depois 31 marsu administrasaun hapara tiha sira tanba tempu hotu tiha ona, depois previsaun verbal ba sira tinan ne’e la prevé ba sira ne’ebé husu Komisaun atu ajuda ko’alia ho ministru kombetente bele garantia fali sira-nia servisu, iha tempu oin mai”, esplika nia.

Nune'e, sei hato’o ba Ministériu konpetente oinsá rezolve problema ne’ebé mak trabalhadór sira enfrenta tanba ne’e sira-nia moris ho servisu ne’ebé mak sira iha. 

“Depois ita ko’alia took ho ministériu kompetente atu haree situasaun ne’e, sira na’in-18 mak ema hapara, sira hamoos esgotu “Hamos valeta”, servisusSaneamentu nian, sira ladún kontente ho desizaun ne’ebé mak hapara sira-nia servisu, envora administrasaun iha razaun maibé hanesan servidor povu ne’e, kualker desizaun tenke sukat sekuénsia ne’e”, katak nia.

Tanba ne’e Komisaun A simu lamentasaun husi funsionáriu kontratatadu hafoin halo analiza no justifika sira-nia razaun ne’e haruka ministériu konpetente atubele haree, liliu Ministériu Administrasaun Estatal (MAE) Munisípiu Díli nian, Komisaun sei haree oinsá mak rekomenda ba Governu. (*)