Print this page

FRETILIN Husu SETP Indentifika Ema Utiliza Edifísiu Estadu

Deputada Bankada FRETILIN, Lidia Norberta. Deputada Bankada FRETILIN, Lidia Norberta. Foto Suplay

Tempotimor (Dili)-Deputada Bankada FRETILIN, Lidia Norberta husu Sekretáriu Estadu ba Terras Propriedade (SETP), Eldino Rodrigues dos Santos, atu indentifika Edifísiu Estadu ne'ebé ema aluga maibé estadu la hetan reseita ruma.

“Mudansa ba estrutura Governu liliu iha Sekretáriu Estadu Terras e Propriedade, ho nune'e ami hakarak husu se bele karik Sekretáriu Estadu Terras Propriedade atu indentifika took edifísiu la'ós uma ema hela de'et la’e, uma Estadu nian laiha, edifísiu Estadu sira ne'e hodi ita bele hatene se se mak uza ida ne'e”, dehan Nia Intervensaun iha Plenaria Parlamentu Nasionál, segunda (04/04).

Tanba ezemplu konkretu iha Tribunál Distrital Dili nia sorin uma Portugéz ida iha ne'ebá, la hatene se los mak uza uma ida ne'e, e agora dadauk ne'e Estadu bele hetan netik reseita ruma ho ida ne'e kala’e?. La'ós de'it ida ne'e, por ezemplu GMN-TV nian uluk iha moru ida ne'ebé ke halo iha GMN nia sorin, lakleur to'o tiha mai sorin baku tiha moru buat ne'e loke naruk tiha, la hatene los ida ne'e Estadu hetan reseita ruma husi ida ne'e kala’e?. Ka ema halo fali aproriasaun de edifisiu estadu, rai ne'ebé estadu nian hodi ba nia prozetu rasik.

“Ami husu ba Sekretáriu Estadu ida foun karik iha mudansa ida ne'e mak servisu sira ne'e lala'o, taun favór ida indentifika tok ida ne'e e liga ba ida ne'e tanke kordena mós ho ministériu sira seluk”, hatutan nia.

Deputada ne’e mós fo tan ezemplu konkretu ida tan hanesan edifísiu sira ne'ebé husik hela iha tempu Indonézia nian pertense ba Forsas Armadas nian, edifísiu sira ne'e, ida ne'e mós indentifika atubele masimiza reseita ba Estadu, nune'e la bele halo disporniza orsamentu ba buat seluk ne'ebé talvez ho Governu masimiza edifísiu sira ne'e bele hetan buat ida ne’ebé di'ak liu ba Estadu.

Hatan ba preokupasaun ne'e, Sekretáriu Estadu Komunikasaun Sosiál (SEKOMS), Mericio Juvinal 'Akara' hatete, kona-ba uma Estadu dadaun ne'e Sekretáriu Estadu Terras Propriedade servisu maka’as hela hodi halo indentifikasaun no iha tempu badak nia sei fó informasaun klaru.

“Kona-ba uma Estadu sira-nia ne'ebé mak ita-nia deputada ida husu kona-ba rendimentu ba estadu oinsá, señor Ministru mós foun agora Sekretáriu Estadu semana kotuk foin ne'e, mais sira na'in-rua servisu maka’as hahú indentifika edifísiu uma estadu sira ne'ebé mak ita-nia setór privadu sira utiliza oinsá, ne'ebé ha'u hanoin iha fulan rua tolu nia laran ne'e sira mós bele mai fó informasaun klaru”, esplika nia.

Tanba Governu mós konkorda ho preokupasaun ne'e oinsá atu organiza edifísiu Estadu hodi hetan rendimentu ba Estadu.

“Mais Governu konkorda katak uma Estadu ita tenke organiza para iha mós rendimentu mai estadu ida ne'e ita-nia pozisaun hanesan”, deklara Akara.

Sekretáriu Estadu Terras Propriedade, Eldino Rodrigues dos Santos hetan pose husi Prezidente Repúblika, Francisco Guterres 'Lú Olo' iha loron 31 fulan-marsu tinan 2022 hodi troka Sekretáriu Estadu Terras Propriedade, Mario Ximenes. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items