“Ami buka hela, purque ema ke simu ne'e mós tauk tanba sira hela dook, polísia mós laiha, polísia balun mós la reajen, tanba ne'e mak sira mós tauk. Mais ami iha ona 2 ka 3 ke prontu atu denunsia”, informa Alkatiri iha Palásiu Prezidensiál, Bairopite, kinta (31/03).
Maske iha kandidatu balun kontinua hanoin sosa votu, maibé nafatin lori vitoria ba Kandidatu Lú Olo iha eleisaun segundu volta tanba militante no partidu FRETILIN sempre sólidu.
“Ha'u laiha dúvida, Lú Olo manán, tanba Lú Olo la presiza sosa votu. ami sei tun ba baze e sira be sosa votu ne'e, atu sosa to'o iha ne'ebé”, dehan nia.
Tanba iha eleisaun primeiru volta hatudu ona, militante FRETILIN ne'ebé mak fó apoiu ba kandidatu Lú Olo ho Jenerál Lere nian, sura hamutuk rihun 180, ida ne'e kompleta ona militante partidu FRETILIN hamutuk rihun 190, siknifika ema sosa mós la hetan.
“Ne'e pontu de partidu sólidu, ne'e lahatene los sé mak fó votu ba sira, keta kontajen mak barak la tuir regra karik ka, tanba ne'e mak ha’u la'ós iha esperansa, ha’u iha serteza ke Prezidente Lú Olo manán”, deklara Alkatiri. (*)
