Rezultadu finál eleisaun Prezidénsia Repúblika (PR) períodu 2022-2027 primeiru volta nian ne'ebé mak kompete husi kandidatu na'in-16, TR válida hodi deside kandidatu na’in-rua hetan votu barak liu hanesan Kandidatu Prezidente Repúblika (PR) Jose Ramos Horta ho votu 303.477 (46,6%), no Francisco Guterres ‘Lú Olo’ ho votu 144.282 (22,1%), avansa ba segunda volta. 

"Ho ida ne'e tuir ita-nia konstituisaun artigu 76 númeru 3 e 4 nomós lei númeru 7/2006 28 dezembru, iha númeru segundu nomós terseiru, nune'e mak kandidatu-rua ne’ebé mais votadu mak sei tama ba segundu volta, ne'e mak kandidatu José Ramos Horta ho Francisco Guterres ‘Lú Olo”, dehan Prezidente TR, Deolindo dos Santos, iha Kaikoli, tersa (29/03).

Tanba rezultadu apuramentu provizóriu ne’ebé mak husi CNE, Tribunál Rekursu liuhusi Juis Koletivu Deolindo dos santos, Jacinta Correia da Costa, no Duarte Tilman Soares, halo análiza katak entre kandidatu na’in-16 laiha idak eleitu iha eleisaun primeira volta ho votu matade ka %50+1 Husi totál votu validu.

"Koletivu ne'e halo anliza tomak ba prosesu sira ne'e hotu la hetan irregularidade ruma ne’ebé bele afeta ba rezultadu eleisaun ida ne’ebé ita hala'o iha 19 marsu. E koletivu mós verifika katak apuramentu ne’ebé CNE halo durante hahú husi estasaun votasaun e sentru vontasaun husi Munisipál to'o apuramentu nasionál, la'o dalan ne’ebé loos”, hatete nia.

Ba rezultadu ne’ebé Komisaun Nasionál ba Eleisaun sira (CNE), submete ba Tribunál Rekursu (TR) iha loron segunda (28/03), hafoin halo verifikasaun durante oras 72, hodi konfere akta rezultadu apuramentu husi sentru votasaun 1.200, tanba ne’e verifika votu nulu no reklamadu sira, ne’ebé haktuir ba Lei Eleitorál ba Prezidente Repúblika nú.15/2021.

Tuir lei eleisaun prezidensiál atribui ba Tribunál Rekursu ne’ebé ezerse kompeténsia Supremu Tribunál ba Justisa hodi apresia no valida desizaun ba akta apuramentu nasionál eleisaun prezidensiál ne’ebé realiza ona iha 19 marsu.

Iha apuramentu nasionál, CNE simu votu nulu hamutuk 12.706, votu reklamadu 437, ho totál iha votu nulu hamutuk 13.143, hafoin halo verifikasaun durante prosesu apuramentu, CNE deside sai nulu 8.386, sai rejeitadu 5, branku 67 no sai válidu hamutuk 4.687.

Iha publikasaun rezultadu finál provizóriu ne’e, partisipa husi reprezentante kandidatura na’in-16, observadór nasionál no internasionál.

Husi rezultadu ne’e kandidatura José Ramos Horta hetan votu hamutuk 303.477 (46,6%), Francisco Guterres ‘Lú Olo’ iha votu 144.282 (22,1%), Armanda Berta dos Santos hetan votu 56.690 (8,7%), Tito da Costa Cristóvão ‘Lere Anan Timur’ iha pozisaun datolu ho votu 49.314 (7,6%), Mariano Assanami Lopes Sabino iha votu 47.334 (7,3%), no Anacleto Bento votu 13.205 (2,0%).

Ba Kandidatu Martinho Germano da Silva Gusmão ho votu 8.598 (1,3%), Hermes da Rosa Correia Barros votu 8.030 (1,2%), Maria Helena Lopes de Jesus Pires iha votu 5.430 (0,8%), Isabel da Costa Fereira votu  4.219 (0,6%), Felisberto Araújo Duarte votu  2.709 (0,4%), kandidatu Constâncio da Conçeicão Pinto ‘Terus’ ho votu 2.520 (0,4%), Rogério Tiago de Fátima Lobato votu 2.050 (0,3%), Virgílio da Silva Guterres ‘Lamukan’ votu 1.720 (0,3%), Antero Bendito da Silva hetan votu 1.562 (0,2%) no Maria Angela Freitas da Silva ne’ebé hetan de’it votu 711 (0,1%).

Ho nune’e totál votu válidu iha territóriu tomak ba kadidatura na’in-16 ne’e hamutuk 651,859.

Tribunál Rekursu halo análiza ba dokumentasaun ne’ebé CNE haruka, valida rezultadu, fó-sai rezultadu no númeru eleitór sira ne’ebé rejista ona, votante, votu branku no votu nulu no votu sira ne’ebé atribui ba kandidatu ida-idak.

Ba Rezultadu ne’ebé pronunsia, Tribunál Rekursu mós halo públikasaun iha Jornál Repúblika tuir akórdaun Tribunál Rekursu nian. (*)