Login to your account

Username *
Password *
Remember Me

Komunidade Seroja Rejeita Husik Hela Fatin ba Eskola São Miguel

Portavoz Komunidade Baiiro Seroja, Elvis Martins akompaña husi komunidade sira deklara sai hela sira-nia preokupasaun, iha Bairu Seroja, sesta (25/03). Portavoz Komunidade Baiiro Seroja, Elvis Martins akompaña husi komunidade sira deklara sai hela sira-nia preokupasaun, iha Bairu Seroja, sesta (25/03). Foto Tempo Timor

Tempotimor (Dili)-Komunidade husi Bairu Seroja Aldea Golgota, Suku Komoro, Postu Administrativu Dom Aleixo, rejeita husik sira-nia hela fatin ba Eskola São Minguel (ESM) ho Televizaun Edukadaun (TVE) atu hari’i Edifísiu, tanba Governu deside entrega rai estadu ba Instituisaun privadu hodi hasai komunidade.

“Ami komunidade Bairu Seroja lasatisfas no rejeita totál desizaun Governu ne'ebé atu hasai komunidade Bairu Seroja husi hela fatin ka (gusur), hodi assegura no fó previlejiu ba instituisaun privadu São Miguel Arcanjo no TVE (televizaun edukasaun) duke nia povu rasik”, dehan Portavoz Komunidade Bairo Seroja, Elvis Martins, liuhusi konferénsia imprensa iha Bairu Seroja, sesta (25/03).

Tan ne'e komunidade konsidera deszjaun injustu no laiha utilidade ba nia povu. “Ami rejeita hodi defende ami-nia direitu tuir Konstituisaun RDTL artiguº 54 (direitu ba propriedade privadu) no artigu 58° (hela fatin) nomós ami husu ba Governu atu trata ami ho dignu laiha deskriminasaun no hatuur povu iha justisa sosiál tuir KRDTL artigu 6 (objetivu estadu)”

Komunidade rejeita ho razaun tanba tuir lei orgániku Governu daualu ba fins investimentu boot kona-ba arendamentu ba rai no uma Estadu (hanesan edifísiu ba eskola konsidera/kategória investimentu boot) ne'e kompeténsia Ministru justisa mak tetu no deside, la’ós Vise Ministru Obras Públika tanba kompeténsia Vise Ministru Obras Públika nian atu haree de'it ba parte afetasaun.

Eskola São Miguel no TVE iha fins lukrutivu, maibé durante halo okupasaun iha atuál eskola refere sem submete iha prosessu kontratu arendamentu ho Estadu (liliu ba diresaun jerál terras propriedade- Ministériu da Justisa).

"Eskola São Miguel no TVE nu'udar eskola ne'ebé hetan lukru husi estudante sira sem iha prosesu arendamentu ho Estadu maibé edifísiu eskola São Miguel no TVE mak impede estadu atu hala'o alargamentu ba estrada nasionál ne'ebé liga munisípiu sira ho kapitál Dili, liliu liga ba Portu Tibar, no piór liu ezije Estadu atu kompensa sira-nia edifísiu no kustu 1 millaun 200 mil dolar amerikanu ($1.200.000)”, esplika nia.

Komunidade seroja prontu regula nia okupasaun direita ho Governu liuhusi kontratu arendamentu, no la aseita entrega rai ba eskola São Miguel no TVE ne'ebé la konsidera nu'udar instítuisaun Estadu ida.

“Husu sua exselénsia Primeiru Ministru, Taur Matan Ruak, atu altera desizaun ne'ebé mak foti ona liuhusi Konsellu Ministru kona-ba muda eskola São miguel no TVE ba Bairo Seroja”, dehan nia.

Ho desizaun ne'ebé mak Terras Propriedades no Obras Públika foti ne'e la koletivu tan laiha despaixu husi Ministériu Justisa, no komunidade ezije ekipa tékniku atu tun terrenu lori ho despaixu legál husi Ministru Justisa.

“Ami la satisfas ho desizaun Governu ne'ebé atu oferese komunidade Seroja nia hela fatin ba instituisaun privadu. Haree ba estadu ida ne'ebé hatuur Estadu de direitu demokrátiku ne'ebé trata nia sidadaun ho iguál no dignu maibé infelizmente trata de'it ema ne'ebé iha poder (fahe klasse) fó previlejiu ba ema empreza privadu”, afirma nia.

Komunidade mós husu tanba sá tenke Bairu Seroja, sera ke Estadu laiha ona hanoin estratéjiku atu kria edukasaun ida ne'ebé dignu iha Bairu ne'ebé livre husi destrundu, tanba hari’i eskola iha Bairu ida ne'e besik liu ho aeroportu internasionál Nicolau Lobatu siknikfika prejudíka atividade aprendizajen.

“Estadu ida ne'ebé hanaran Estadu de direitu demokrátiku ne'ebé garante sustentabilidade, tanba sá tenke fó oportunidade atu kria Estadu kapítalista, mesmu indireta maibé psikolojikamente hatudu duni”, hatutan nia.

Governu ezije komunidade seroja atu koopera ho Estadu hodi halo dezenvolvimentu, maibé tanba sá?. Governu la ezije São Miguel atu koopera ho Estadu husik hela ninia edifísiu hodi halo konstrusaun alargamentu ba estrada.

“Ami haree katak emprezáriu São Miguel no TVE hetan lukru privadu, maibé uza fali mákina Estadu hodi hanehan komunidade Bairu Seroja nia direitu. Serake ami povu Seroja ne'e oan-ki'ak ba Estadu Timor-Leste”, deklara nia.

Tanba ne'e komunidade Bairu Seroja rekomenda ba Governu liuhusi Konsellu Ministru tenke tetu no analiza didiak antes atu foti desizaun fó propriedade Estadu ba instituisaun privadu.

Xefe Aldea Golgota, Bairu Seroja, Agostinho de Sousa Pereira hatete, hanesan autoridade lokál nia la bele diskrimina populasaun ho Governu maibé rua ne'e tenke koopera hotu.

“Hanesan Xefe aldea ha'u husu nafatin ba parte Ministériu kompetente atu buka took solusaun ruma hodi bele fó solusaun ba populasaun aldeia ida ne'e, liliu Bairu Seroja ne'e nia problema, liliu ba populasaun sira ne'ebé afetadu ba konstrusaun edifísiu São Minguel”, dehan nia.

Enkuantu totál populasaun uma-ka’in iha aldea Golgota, Bairu Seroja hamutuk 72, maibé uma-kain ne'ebé afeta ba rai Estadu seidauk iha tanba Governu seidauk termina ninia beliza. (*)

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« February 2024 »
Mon Tue Wed Thu Fri Sat Sun
      1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29      

Tempo Timor Networks

Online Counter