Tanba ne’e, JSMP hamutuk ho Alfela no Grupu Advokasia sira halo enkontru diskute posibilidade sira ne'ebé bele halo ba partisipasaun publiku iha prosesu halo lei, tanba dala barak partisipasaun públiku menus iha kriasaun lei.

Ho enkontru ne'e JSMP ho Alfela konvida parseiru sira ne'ebé mak serbisu ba asuntu Advokasia nian, atubele tau hamutuk forsa liliu haree filafali kona-ba planu advokasia ne'ebé mak halo kleur ona, iha alterasaun kódigu Penal, no iha ligasaun ho asuntu insestu.

“Ida ne'e hanesan asuntu ne'ebé mak ami JSMP ho Alfela nomós parseiru sira grupu advokasia, kontinua buka ko’alia hamutuk, atu nune'e tau hamutuk hanoin, no atualiza dadus sira kona-ba asuntu insestu, depois ami aprezenta fali ba Parlamentu Nasionál, hodi sira bele iha hanoin atu konsidera asuntu ne'ebé mak sai hanesan ami-nia preokupasaun no públiku nia preokupasaun, liliu iha relasaun asuntu insestu nian”, dehan Advokasia JSMP, Joseé Moniz, iha salaun JSMP, kuarta (23/03).

Iha mós asuntu seluk konsege ko’alia hotu oinsá haree kona-ba partisipasaun sosiedade sivíl no públiku nian iha prosesu halo lei. Tanba iha esperiénsia durante ne'e, haree katak, partisipasaun públiku nian iha prosesu halo lei ne'e, mínimu tebes.

“Ho ida ne'e mak ami hanoin katak, importante tebes ami ko’alia hamutuk atu haree posibilidade rejimentu Parlamentu Nasionál nian, karik iha rejimentu ne'e bele obriga deputadu sira, hodi bele halo konsultasaun kualker esbosu lei sira, atu nune'e ita-nia lei sira ne'e bele duni reflete ita-nia situasaun Timor nian, la'ós ita-nia lei sira ne'ebé mak ita halo ne'e, hanesan dalaruma ema barak hanoin katak, ita lori de’it nasaun sira-nian husi CPLP nian”, dehan nia.

Iha prosesu halo lei ne'e, di’ak liu partisipasaun sosiedade sivíl no públiku nian, bele fó idea ka hanoin kona-ba esbosu lei sira ne'e, tanba iha esperiénsia katak, dalaruma iha Parlamentu Nasionál ka Governu la halo konsultasaun kle'an kona-ba esbosu lei sira ne'ebé mak diskute.

“Durante ne'e mós ami haree katak, maske Guvernu ka Parlamentu sira halo konsultasaun, maibé ho tempu ne'ebé limitadu, kada vez iha semana ida, entaun la sufisiente ba sosiedade sivíl no públiku, hodi hato'o sira-nia hanoin no fó pareser, para bele kontribui ba lei ruma ne'ebé mak ita konsidera katak, refleta duni iha ita-nia situasaun”, haktenik nia.

Enkuantu iha organizaun ba serbisu Gurpu Advokasia ne'e mak, JSMP, Alfael, Fundasaun Mahon, MDI, AJAR, Fundasaun Alola, FOKUPERS, PRADET, CNJTL, AHMDTL, organizasaun lubuk ida sira ne'ebé mak hola parte iha grupu advokasia ninian. (*)