Komandante PNTL Munisípiu Ainaru, Superintendente Justino Menezes hatete, kazu omesidu ne’ebé akontese iha loron 12 fulan-marsu 2022, tuku 01:00 meudia iha suku Nunumoge, dadaun ne’e PNTL lori ona ba Tribunál Distritál Suai hodi foti desizaun ba prizaun prevensaun.
“Suspeitu AE idade 58 oho vítima, Manuel Pereira idade 30 ita lori ona ba Tribunál Suai atu foti desizaun, maibé desizaun dahuluk sei prizaun preventiva, depois mak halo julgamentu”, dehan Komandante Justino liuhusi telefone, segunda (14/03).
Entretantu Xefe Departamentu Relasaun Públiku PNTL, Superintendente Xefe Armando Monteiro hatete, kazu omesidu agravadu ne'ebé akontese iha Ainaru, motivu lolos tanba odi vigansa iha pasadu.
Vítima ho suspeitu iha problema antes tiha ona, no vítima hetan ona akuzasaun, no kumpri nian dever hafoin sai husi prizaun, maibé sira tenta provoka malu entaun vítima sai fali suspeitu ba kazu odi vigansa iha pasadu ida ne'e.
Husi akontesementu ne'e, Servisu Investigasaun Kriminál Munisípiu Ainaru, to'o kedas lokál de krime hodi halo prosesu polisiál hodi kaptura suspeitu inisial EA idade 58 iha fatin akontesimentu.
Suspeitu dadaun ne'e lori ona ba Tribunál Distritál Suai hodi submete ba primeira interigatóriu atu hetan desizaun final. (*)
