Rigoberto iha MTKI: Asesor ne’ebé Deskonfia Fó Serbisu ba Asesor 15

Lista Asesor ho sira nia salariu iha MTKI Lista Asesor ho sira nia salariu iha MTKI Foto Eskluxivu

Tempotimor (Dili)-Iha inisiu governasaun Aliansa Mudansa ba Progresu (AMP), Jacinto Rigoberto de Deus sai nu’udar kandidatu ba kargu Vise Ministru Solidariedade Sosial no Inkluzaun, maibé Prezidente Repúblika Francisco Guterres Lu Olo lakohi atu fó posse, nune’e ikus mai, Jacinto Rigoberto hetan fiar husi governu hodi sai de’it nu’udar asesor prinsipal iha MTKI.

Politika governu iha altura ne’ebá hodi oferese pozisaun refere ba Rigoberto tanba mós kandidatu ba Ministru Turizmu, Komersiu no Industria Francisco Kalbuadi Lay, tama mós iha lista pendente membru governu konstitusional daulu.

Hafoin hetan konfiansa ida ne’e, deskonfia, liu fulan ida, Rigoberto hahú fó serbisu ba asesor nasional na’in 12 no asesor internasional na’in 3.

Entretantu, molok Rigoberto tama iha MTKI, iha ona asesor nasional na’in 9 mak serbisu iha ne’ebá. Signifika, hafoin Rigoberto tama no iha rekrutamentu ba asesor nasional no internasional, total asesor ne’ebé serbisu iha MTKI hamutuk na’in 26.

Tuir informasaun husi fonte www.tempotimor.com, ne’ebé lakohi públika ninia identidade, asesor na’in 15 husi total asesor na’in 25 ne’e, serbisu iha MTKI tanba Rigoberto mak bolu sira.

"Momentu Ministru Turizmu Komersiu Industria (MTKI) laiha no Ministru Interinu mak Agio Pereira, entaun governu nomeia Jacinto Rigoberto de Deus mak sai asesor prinsipal par tau-matan ba Ministériu, entaun nia (Rigoberto) kala sente bele ou labele ka todan mak ne'e, entaun nia haruka proposta ba Ministru Interinu atu presiza tan asesor, entaun Ministru Interinu aprova, nia (Rigoberto) bolu tan asesor hirak ne'e mai. Asesor sira ne'e bolu de'it,” dehan fonte ne’e.

Konserteza, ho titlu asesor ne’ebé ema na’in 26 lori, inklui Rigoberto, salariu ne’ebé governu tenke fó ba sira mós la’os kiik.

Tuir lista ne’ebé www.tempotimor.com asesu, asesor ho salariu boot mak $8,000.00 kada fulan, no salariu kiik liu mak $700.00 kada fulan.

Asesor ho salariu $8,000.00 kada fulan mak asesor internasional na’in rua, asesor juridiku ba gabinete ministru, Joao Lourenco Conrado de Evangelista Monge; no asesor juridiku iha GATJ, George Barbosa da Silva.

Jacinto Rigoberto nu’udar asesor prinsipal gabinete ministru, simu salariu $6,500.00 kada fulan, okupa númeru daruak husi asesor ho salariu boot liu.

Tuir mai, Lucia Isabel de Oliveira Vieira, nu’udar asesor internasional ho pozisaun Assesoria Teknika ba area Turizmu, Komersiu no Industria, iha gabinete ministru ho salariu $6,000.00 kada fulan.

Asesor ho salariu $5,000.00 kada fulan mak Assesora Ezekutiva iha Area Planeamentu no Administrasaun iha gabinete ministru, Catarina Filomena Barromeu Duarte Soares.

Asesor nasional ho $3,500.00 kada fulan mak asesor juridiku iha GATJ, Benevides Correia Barros. Hanesan informasaun, iha GATJ iha asesor na’in rua, ida asesor internasional no ida fali asesor nasional.

Tuir mai, asesor nasional ne’ebé fó asesoria ba Inpetór Jeral Jogos mak Adalberto dos Santos Fernandes Alves ho salariu $3,000.00 kada fulan.

Iha asesor nasionál na’in rua iha gabinete ministru ne’ebé ho salariu $2,500.00 kada fulan, mak Assesor ba Area Promosaun Komersiu, Alexandre Pires, no Assesor ba area Aprovizioamentu no Jestaun Finanseira, Egidio Dinis Martins.

Asesor seluk iha gabinete ministru ho salariu $2,000.00 kada fulan mak Assesor ba Area Administrasaun, Alves Gomes Martins, no Assesor Finansas, Aprovizionamentu no Logistika MTKI, Augusto Panao Amaral.

Asesor ho salariu $1,500.00 kada fulan mak Assesor ba area Tradusaun Tiago Jose M. B. D. Soares; Assesoria ba area Turizmu Firmino Taequi; Assesoria ba area Jogos, Saul Salvador H. J. Amaral; Assesor ba area Promosaun Komersiu, Jose Maria Goncalves; no Assesor Ispetór Jeral Jogos, Anacleto Freitas.

Asesor nasionál na’in ida iha gabinete ministru ho pozisaun asesora mak Diamantina Mendonca de Araujo, ho salariu $1,200.00 kada fulan.

Tuir mai, iha asesor na’in rua iha gabinete ministru ne’ebé hala’o funsaun hanesan, Assesor ba Area Turizmu Komunitariu, ho salariu $1,000.00 kada fulan, mak Maria Franga Guterres, no Salustiana Maria da Costa Simoes.

Asesor nasional iha DGCAFP ho salariu $750.00 mak T.A. Protokolo no Relasaun Publika, Agostinha Maria dos Santos, no Assesoria Protokolo, Joao Baptista Floriondo da Costa Guterres, no mós asesor iha Diresaun Nasional Aprovizionamentu ho pozisaun Konsultor Nasional Joenel Mario Noronha.

Iha númeru ikus liu mak asesor nasional iha Gabinete Diretor Jeral Industria no pozisaun Konsultór Nasionál mak Helio Americo Deus Sarmento ho salariu $700.00 kada fulan.

Husi total asesor ne’e, kada fulan MTCI tenke hasai osan hamutuk $67,400.00, signifika, durante Rigoberto nia mandatu ba tinan rua ho balun, MTCI gasta osan liu $1,617,600.00 hodi selu asesor sira.

 

Rigoberto Duun ba Agio ho Fidelis

Caption : Ministru Fidelis Magalhães hamutuk ho asesor Prinsipal Jacinto Rigoberto hasoru malu ho asesos no bo'ot sira husi MTKI iha Agusto 2019                         Foto : Facebook MRLAP

 

Entretantu, eis asesor principal MTKI Jacinto Rigoberto de Deus hatete, desizaun no aprovasaun ba rekrutamentu asesor durante nia tau-matan mai husi Ministru MTCI Interinu Agio Pereira no Fidelis Leite Magalhaes.

"Asesor iha MTKI hamutuk na'in 26 ne'e kompetensia Ministru Interinu nian, la'os asesor mak asina fali asesor nia kontratu," dehan nia.

Rigoberto esplika, durante asumi responsablidade hanesan asesor prinsipal iha MTKI, nia funsaun mak atu fasilita de'it servisu Ministru Interinu ninian, tan ne’e kualker desizaun mai husi Ministru Interinu.

"Durante ha’u-nia mandatu, ha’u hanesan asesor prinsipal iha MTKI par atu bele fasilita servisu Ministru ninian nu'udár Ministru Interinu, depois ita-boot sira akompaña durante periodu enfrenta hela ho orsamentu duadesimu to'o mai Covid-19 mosu, ne’ebé laiha progresu importante mak la'o iha MTKI, iha planu barak seidauk bele realiza, tanba orsamentu seidauk aprova."

Durante iha MTKI, nia hatete, planu prioridade ne'ebé atu implementa mak dezenvolve area industria no turizmu komunitariu.

"Planu mak halo parte industria no turizmu komunitariu sira hotu, maibé la konsege tanba orsamentu laiha," dehan nia.

Kona-ba situasaun asesor na’in 25 seluk, Rigoberto dehan, nia laiha ona kompetensia atu intervene, tanba asuntu ne'e kabe ba Ministru Interinu.

"Asesor nai'n 25 iha MTKI ha’u la hatene no la interven ida ne'e, tanba kompetensia Ministru nian no kompetensia membru governu ninian mak deside atu hapara ou kontinua, tanba ha’u mós laiha ne'eba ona, ne'ebé ha’u la hatene ona kona-ba situasaun iha ne’eba."

"Ha’u delega hanesan asesor, maibé la'os hanesan kompetensia legal par asina ida ne'e ou ida ne’eba, ha’u so apezar vistu ka check de'it," dehan nia.

Kona-ba númeru asesor, Rigoberto hatete, númeru asesor kada ministériu barak, la'os iha MTKI de'it.

"MTKI ne'e ministériu ne'ebé boot. Asesor 20 ka 100 ne'e la'os kestaun, maibé kestaun ne'e see mak iha kompetensia aprova asesor hira-hira, i la'os iha MTKI de'it mak asesor barak maibé, Ministériu hotu-hotu asesor barak. Asesor iha MTKI ulu-uluk sira ne'e naran tau hamutuk hotu iha ne'eba par atu husu Ministru estende ou hapara," dehan Rigoberto.

Maske nune’e, nia rekoñese duni katak, nia mak aprezenta proposta ba rekrutamentu asesor ba Ministru MTKI interinu hodi bele hetan aprovasaun, tanba atu rekruta asesor la’os ninia kompetensia, maibé ministru ninia kompetensia.

"Rekrutamentu asesor ne'e ha’u hato'o proposta de'it, maibé aprova ne'e Ministru mak iha kompetensia par atu aprova ou lae, hanesan Timor-oan hakarak atu partisipa ne'e la taka dalan maibé, kabe ba Ministru atu aprova ou lae."

Kona-ba númeru asesor ne’ebé ajuda nia durante ninia mandatu, Rigoberto dehan, nia haluha ona, tanba asesor balun tama ona antes no seluk tama ikus.

"Ha’u sai tiha ona, entaun haluha ona, tanba asesor sira ne'e balun tama uluk no balun ikus depois elabora hamutuk de'it."

Entretantu, tuir lista ne’ebé www.tempotimor.com asesu, iha asesor na’in sia mak asina ona kontratu serbisu molok Jacinto Rigoberto asina kontratu serbisu nu’udar asesor prinsipal.

Iha asesor na’in 4 mak hahú tama serbisu husi tinan 2013 to’o 2017. Asesor ida mak hahú nia kontratu iha 1 Jullu 2013 mak asesor nasionál iha Diresaun Nasional Komersiu Interinu ho salariu $750.00 kada fulan; na’in ida hahú kontratu iha 22 Setembru 2015 mak asesor nasionál iha Diresaun Nasionál Aprovizionamentu ho salariu $750.00/fulan; na’in rua mak hahú kontratu iha 1 Janeiru 2017, ida iha Diresaun Jeral Komersiu ho salariu $2,500.00/fulan, no ida seluk iha Gabinete Diretor Jeral Industria ho salariu $750.00/fulan.

Enkuantu, iha asesor nasional na’in lima (5) seluk ne’ebé hahú serbisu iha 1 Maiu 2019, fulan ida molok Jacinto Rigoberto hahú serbisu. Na’in ida ho salariu $750.00/fulan, na’in ida ho salariu $1,000.00/fulan, na’in rua ho salariu $1,500.00/fulan, no na’in ida ho salariu $2,500.00/fulan.

Hanesan informasaun, asesor hirak ne’ebé tama uluk Rigoberto, nia salariu boot liu mak $2,500.00/fulan, no kiik liu mak $700.00/fulan.

Tuir lista ne’e, Jacinto Rigoberto hahú hala’o serbisu nu’udar asesor prinsipal iha MTKI iha 1 Juñu 2019. Hafoin nia tau-matan ba MTKI, asesor foun hahú buras.

Asesor na’in ida mak hahú asina kontratu iha 1 Jullu 2019, na’in sia (9) asina kontratu iha 15 Jullu 2019, na’in ida 1 Agostu 2019, na’in ida iha 15 Agostu 2019, na’in ida iha 1 Setembru 2019, na’in ida iha 19 Setembru 2019, no na’in ida iha 16 Outubru 2019.

Signifika, hafoin Rigoberto asina kontratu hodi sai asesor prinsipal iha MTKI, iha asesor foun na’in 15 mak asina kontratu serbisu, kompostu husi asesor internasional na’in 3 no asesor nasional na’in 12.

Husi total asesor ne’ebé tama hafoin Rigoberto tama MTKI, na’in ida mak ho salariu $750.00/fulan, ho salariu $1,000.00/fulan, na’in 4 ho salariu $1,500.00/fulan, na’in ida ho salariu $2,500.00/fulan, na’in 2 ho salariu $2,000.00/fulan, na’in ida ho salariu $3,000.00/fulan, na’in ida ho salariu $3,500.00/fulan, na’in ida ho salariu $5,000.00/fulan, na’in ida ho salariu $6,000.00/fulan, no na’in 2 ho salariu $8,000.00/fulan.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.