Login to your account

Username *
Password *
Remember Me

Jogadas iha MTK: Tender ba STNK ne’ebé sai de’it Kurtina

Espesifikasaun blanco ne'ebe fo sai husi MTK  wainhira loke tender Espesifikasaun blanco ne'ebe fo sai husi MTK wainhira loke tender Foto tempotimor.com

Tempotimor (Dili)-Diresaun Nasionál Aprovizionamentu (DNA) Ministériu Transporte no Komunikasau (MTK) loke tenderizasaun hanesan kurtina de’it tanba kompaña ne’ebé manan tender ne’e iha ona.

Kazu ida ne’ebé bele prova jogadas iha MTK mak prosesu tenderizaun ba sosa Blanco Livretes (STNK) ba Diresaun Nasionál Transporte Terrestre (DNTT).

Molok DNA-MTK anunsia tenderizaun ba sosa Blanco Livretes ne’e, kompaña imprime Grafic Patria hato’o ona pedidu ba Diretór Jeral Transporte no Komunikasaun (DJTK), Joanico Goncalves.

Tuir dokumentus ne’ebé Tempotimor.com asesu, iha 4 Janeiru 2019, Grafic Patria haruka karta ida ba DJTK ho númeru 002/GP-TL/1/2019 ne’ebé asina husi ninia Diretór, E.J.A Widjaja, informa kona-ba Blanco Karta Kondusaun (SIM) no Blanco Livretes (STNK) restu ne’ebé sira-nia kompaña sei rai.

“Atu fó hatene kondisaun sasan ne’ebé temi (SIM no STNK) ho kondisaun di’ak no prontu uza. Se aseita, favor konfirma atu ami bele hato’o kotasaun presu,” informa Grafic Patria ne’e liu husi karta ne’ebé hakerek ho lian Indonezia.

Iha karta refere, Grafic Patria mós fó detallu Blanco Livretes restu hamutuk 24.000 ne’ebé sira sei rai. Blanco Livretes ho númeru seri 0062000-0066000 hamutuk tahan 4.000; 0070001-0074000 hamutuk tahan 4.000; 00740001-0078000 hamutuk tahan 4.000; 00780001-0082000 hamutuk tahan 4.000; 0090001-0094000 hamutuk tahan 4.000; no 0094001-0098000 hamutuk tahan 4.000.

Atu bele evita deskonfiansa no bele konsidera katak MTK hala’o duni serbisu tuir lei aprovizionamentu nian, iha 5 Marsu 2019, DJTK hasai konvite ba lisitasaun ba projetu sosa Blanco Livretes (STNK) ba DNTT ho númeru referensia RFQ-001-MTC.

Iha mós karta avizu tender RFQ ho númeru 0001&00013.Tender/DNA/II/2019 husi Diresaun Nasionál Aprovizionamentu ne’ebé asina husi Diretora Nasionál Aprovizionamentu Lucia do Rosario Pereira.

Iha avizu refere, DNA fó sai tender kona-ba sosa Blanco Livretes no Limpeza ka Serbisu Sanitaria MTC no DNTM.

Tuir karta ne’e, loron hahú loke tender ba projetu hirak ne’e hahú iha 5 Marsu no loron submisaun iha 20 Marsu 2019.

Hafoin prosesu tenderizasaun ne’e la’o, bele sig ona saida mak mosu. Kompaña Imprime Grafic Patria mak konsege manan projetu refere.

Hafoin “manan” projetu, iha 12 Abril 2019, Grafic Patria hato’o tan pedidu aprovasaun ba fornesimentu Blanco Livretes ba Diretór Jeral Administrasaun Finansas (DJAF) MTK, Deonisio de Araujo.

Iha pedidu ne’ebé Cc ba Ministru Transporte no Komunikasaun ne’e, kompaña Grafic Patria husu ba DJAF atu aprova Blanco Livretes hamutuk tahan 24.000, ho númeru seri 0062000-0066000 hamutuk tahan 4.000; 0070001-0074000 hamutuk tahan 4.000; 00740001-0078000 hamutuk tahan 4.000; 00780001-0082000 hamutuk tahan 4.000; 0090001-0094000 hamutuk tahan 4.000; no 0094001-0098000 hamutuk tahan 4.000.

Bazeia ba pedidu ne’e, iha 14 Abril 2019, DJAF hasai desizaun hodi aprova de’it Blanco Livretes hamutuk tahan 20.000. hahú husi númeru seri 0070001 to’o 0098000. DJAF la aprova númeru seri 0062000 to’o 0066000.

Iha 24 Abril 2019, Diretór Nasionál Transporte Terrestre, Natalino de Rosario hato’o karta justifikasaun ba DNJF. Iha karta refere, Diretór ne’e hato’o justifikasaun kona-ba nesesidade Blanco Livretes no kestaun sira seluk ne’ebé relasiona ho prosesu imprime ba Blanco refere.

Iha karta ne’e, Diretór Natalino informa katak to’o agora, dokumentu rejistu veikulu ne’ebé kliente sira selu ona hamutuk 25.930 dokumentus ne’ebé kompostu husi: DNTT Nasional ho dokumentus 14.630; DNTT Munisipiu Baukau ho 5.000 dokumentus; DNTT Munisipiu Bobonaro ho dokumentus o 3.800; no DNTT Munisipiu Manufahi ho dokumentus 2.500.

Maske númeru nesesidade ne’e boot liu kompara ho númeru ne’ebé DJAF aprova, maibé Diretór Natalino deklara katak, DNTT konkorta ho desizaun DJAF atu produs de’it Blanco Livretes tahan 20.000.

Maibé, iha 15 Maiu 2019, parte kompaña hato’o fila fali karta ida ba DJAF hodi husu ajuda atu aprova Blanco Livretes hamutuk tahan 20,874.

Iha karta refere, kompaña hato’o razaun sira husu ajuda atu aumenta kuantidade Blanco Livretes hamutuk tahan 874 tanba sira hetan difikuldade atu halo imprime de’it ba Blanco Livretes tahan 874.

Iha karta ne’e kompaña hatete, “Ami hetan difikuldade atu imprime de’it Blanco Livretes tahan 874. Laiha kompaña imprime ida mak hakarak atu halo imprime ba kuantidade refere. Tan ne’e ami husu ajuda no desizaun husi Señor atu simu númeru refere atu ami bele selu ami-nia kontratu ho total tahan 20,874.”

Ho karta husi kompaña ne’e, DJAF hatudu nia “laran di’ak” hodi aprova. Iha loron hanesan, 15 Abril, DJAF hakerek nota aprova no ezekuta iha karta ne’ebé kompaña haruka ba no la iha justifikasaun ruma husi Diretor DNTT.

Prosesu tender la’o normal maibe prosesu fornesimentu maka Diretor jeral aprova fali blanko ne’ebe kompaña rai hela. Tuir informasaun ne’ebé Tempotimor.com asesu, espesifikasaun ba Blanco Livretes ne’ebé kompaña emprime diferente ho espesifikasaun ne’ebé DNTT fó sai.

Tuir espesifikasaun husi DNTT, númeru seri Blanco Livretes tenke hahú ho letran “A”, Ezemplu, A0070001. Maibé, realidade kompaña fornese Blanco Livretes modelu tuan ne’ebé la uza letra “A”, ezemplu 0070001.

Ba kestaun ne’e, Tempotimor.com koko konfirma ho DJAF. Deonisio de Araujo maibe rejeita fo komentariu hodi haruka fali Tempotimor.com ba konfirma ho Diretór Nasional Aprovizionamentu (DNA) MTK, Tomas Boavida dos Santos hatete, Blanco Livretes ne'ebé kompaña produs selu hotu ona no Blanco refere loos hotu.

“Loos hotu ne'e mak ita halo ona pagamentu ne'e, tanba ami la'os simu sasan, Se lori mai lojístika depois konfere hotu, katak buat ne'e loos ona, mak direasaun simu depois prepara relatóriu mai ami,” deklara Tomas foin lalais.

Kona-ba espesifikasaun, Diretór ne’e dehan, parte lojistika mak halo inspesaun ba espesifikasaun husi Blanco Livretes.

“Inpesaun ne'e husi lojístika, depois diresaun mós sei haree nia espesifikasaun ne'e tuir duni ka lae, ne'e mak sira simu ne'e. Normal ne'e kuandu la tuir (DNTT) nia hakarak entaun diresaun la simu, maibé simu ona, signifika loos ona,” deklara nia.

Nia afirma katak, Blanco refere tuir duni espesifikasaun ne’ebé MTK fó sai.

“STNK ne'e tuir duni espesifikasaun ne'ebé MTK fó sai duni no to'o agora distribui tan tiha ona ba ita-nia populasaun, la to'o tan, dala-ruma tinan oin sei halo tan tenderizasaun, ne'ebé ida ne'e la problema, SIM (karta kondusaun) mak problema. Agora plat mak hatama dadaun ona, maibé STNK ne'e loos hotu ona,” afirma Diretór ne’e.

Hatan kona-ba desizaun husi DJAF ne’ebé hamosu deskonfiansa no protesta husi ema balun, Diretór ne’e dehan, to’o ohin nia parte seidauk simu protesta ruma.

“Laiha, ema la mai protestu took ida, Durante ne'e laiha protestu eskrita ida mak mai. Se komentáriu de'it iha li'ur, ne'e ema komentáriu de'it.”

Rate this item
(0 votes)
Last modified on Tuesday, 17 December 2019 08:12
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter