Login to your account

Username *
Password *
Remember Me

Deskonfia Governu Autoriza Kompaña Internasional Naok Osan Estadu Featured

Surat Keixa kona-ba Kompaña Internasional la Kumpri nia Dever maibe Governu selu nafatin. Surat Keixa kona-ba Kompaña Internasional la Kumpri nia Dever maibe Governu selu nafatin. Foto tempotimor.com

Tempotimor (DILI)-Governu Timor Leste hatene katak kompaña internasional husi Singapura Websat Media Pte Ltd ne’ebé serbisu hamutuk ho Globalnet Unipesoal, Lda. naok hela osan estadu, maibé governu husik de’it.

Kompaña Websat Media Pte Ltd durante ne’e fornese rede internet supa hela osan estadu tanba la fornese rede internet bazeia ba kontratu ne’ebé iha.

Tuir kontratu ne’ebé asina entre Ministériu Obras Públika, Transporte no Komunikasaun (MOPTK) ho kompaña Websat Media Pte Ltd iha 28 Setembru 2016 hatete, kompaña internasional ne’e sei atualiza ka hasa’e (upgrading) bandwidth satellite husi 100 Mbps ba 200 Mbps durante fulan 36 nia laran, tinan tolu (3), ho total orsamentu $4,984,040.

Iha kontratu ne’ebé iha kada fulan governu sei selu $134,445.56 ba 200 Mbps. Kada Mbps ho folin $672. Maibé, realidade kompaña Websat Media Pte Ltd oferese de’it 140 Mbps kada fulan. Signifika, 60 Mbps lakon saugati no governu kontinua selu kompletu bazeia ba kontratu ne’ebé iha.

Se sura ba osan, kada fulan governu selu saugati $40,320 resin ba kompaña internasionál ne’e, no iha tinan tolu nia laran, bazeia ba kontratu fulan 36, governu lakon osan $1,451,520 resin.

Iha Bill of Quantities (BoQ) hatete mós katak kompaña tenke fornese mós backup 160 Mbps ba downlink no 40 Mbps ba uplink. Maibé, realidade, kompaña Websat Media Pte Ltd nunka oferese backup ne’e.

Tuir sertifikadu pagamentu ho númeru kontratu ICB/073/MOPTC-2016 husi 1 Jullu to’o 31 Outubru 2017, ne’ebé Tempotimor.com asesu, iha fulan haat (4) nia laran, governu selu ona 10.79% husi total kontratu ho orsamentu hamutuk $537,782.24.

Iha lideransa Ministru Gastão Sousa, konsege hasai despaisu ida hodi husu atu haree fila fali kontratu ne’ebé MOPTK halo ho kompaña Websat Media Pte Ltd, maibé prosesu ne’e laiha kontinuasaun.

Iha Governu Konstitusional Daualu, Ministériu Transporte no Komunikasaun identifika mós kazu ida ne’e, maibé to’o ohin loron seidauk konsege halo buat ida.

MTK La Brani Foti Desizaun

Ministru Transporte no Komunikasaun, José Agostinho da Silva hatete, realidade Kompaña internasional husi Singapura oferese rede internet la bazeia ba kontratu ne’ebé iha. Kompaña Websat Media Pte Ltd oferese de’it 140 Mbps kada fulan. 

“Realidade horbainhira bolu sira husi Singapura ne'e dehan oferese to'o de'it 140 Mbps. Agora, nia restu ba iha ne’ebé? depois kada fulan governu selu kompletu rihun $134 resin. Horibainhira buat ne’e sai problema, pagamentu ne’e sai problema,” deklara Ministru ne’e.

Ministru ne’e hatete, bazeia ba kalkulasaun ne’ebé parte MTK halo, governu Timor Leste lakon osan boot ba manipulasaun ne’ebé kompaña Singapura halo.

“Buat ne'e abstratu hela ka lae, ne'e mak ita matan tomak ne'e ita la haree hetan ida, afinal ne'e osan boot liu, ema manipula ami, be ita la haree hetan, ne'ebe ita presiza ema ne'ebé mak iha peritus par haree didi’ak buat ne'e,” dehan nia.

Iha tempu hirak liu ba, Ministru ne’e dehan, nia bolu peritu ida husi Singapura hodi mai esplika manipulasaun ne’ebé kompaña internasional halo.

“Ema ne’e mai esplika buat ne'e detallu, kompletu loos, (kompaña) sira-nia kelemahan ne'e ema esplika, jadi sira prontu par sai sasin ba ita. Ne'ebé prosesu ne'e la'o hela,” nia hatete.

Maibé atu foti desizaun ba problema ne’e, Ministru José dehan, presiza desizaun koletivu ida. Ho nune’e, nia parte lori ona kazu ne’e ba Konsellu Ministru.

“Buat ne’e lori ba Konsellu Ministru, depois ba fali iha KAFI (Konsellu Administrasaun Fundu Infrastrutura), no ba fali iha MPIE, ikus mai husi MPIE ba fali MTK, ne'ebé foin daudauk ne'e haree sira iha hotu, ne'ebé ha'u dehan ita tenke iha desizaun koletivu ida ba pagamentu, mais ita haree hira mak sira oferese, selu mak ida ne'e, labele dehan projetu mais realidade oferese la to'o iha ne'eba depois ita selu kompletu, labele.”

Maske Ministru deskonfia ona Kompaña Internasional ne'e maibe tuir parte balun iha MTK dehan kontratu ne'e loos hela tan ba iha kontratu laran fahe ba parte Down link ho up link.

Recivo Pagamento ne'ebé Governu halo ba Kompaña Internasional husi SingapuraRecivo Pagamento ne'ebé Governu halo ba Kompaña Internasional husi Singapura. Foto special.

Posibilidade Single Source ba Tender Foun

Entretantu, Kompaña Websat Media Pte Ltd husi Singapura sei oferese rede internet to’o iha fulan Outubru tinan ne’e maibé to’o ohin loron governu seidauk halo tenderizasaun foun.

Tuir fonte ida ne’ebé hatene didi’ak prosesu ne’e ba Tempotimor.com katak, maske MTK hatene ona kontratu ne’e sei retama iha fulan Outubru, maibé MTK finze dada prosesu tenderizasaun foun tanba hakarak atu hili de’it kompaña internasional ida husi Indonezia, Telkomsel, hodi kaer projetu fornesimentu rede internet.

Ba kestaun ne’e, Ministru José dehan, kompaña Websat Media Pte Ltd sei oferese rede internet to’o iha fulan Outubru. Signifika iha fulan Novembru no Dezembru sei laiha fornesimentu ba rede internet.

“Prosesu ne'e kleur entaun halo karta (ba PM Taur), prosesu ne'e maizumenus fulan tolu… mais ita-nia maun (PM Taur) ninia desizaun seidauk sai ne'ebé hein hela,” dehan Ministru José.

Hafoin PM Taur hatuun desizaun, nia dehan, MTK sei loke konkursu atu kompaña sira bele konkore.

“Problema ida mak ita-nia orsamentu ba fulan rua ne'e laiha, seidauk iha, horbainhira ne'e to'o de'it iha Outubru 2019, ne'ebe kompañia sira ne'ebé mak konkore ita husu par sira bele asegura fulan rua ne'e depois 2020 ita bele prevee orsamentu par rekopera tiha,” ministru ne’e esplika.

Rate this item
(2 votes)
Last modified on Monday, 07 October 2019 09:32
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter