Tempotimor (Díli) - Estudante sira ne'ebe hala’i sai husi Dili iha loron Sexta (2/4) ba Munisípiu Ermera liu husi dalan Tikus (Laho), maibé Komandu Polísia Nasional Timor-Leste (PNTL) Munisípiu Ermera trava iha área Mota Hare, Postu Rai Lako no lori ba teste SWAB iha Postu Administrativu Gleno, sesta (02/04).

Estudante hamutuk ho komunidade balun ne’ebé ses-an husi Munisípiu Dili, bainhira rona desizaun governu hodi estende serka sanitária iha Kapitál nasaun.

Haree ba Konsellu Ministru ne’ebé aprova projetu Rezolusaun Governu sira ba manutensaun impozisaun serka sanitária no konfinamentu domisiliáru jerál populasaun nian iha munisípiu Dili to’o oras 23:59 loron 16 fulan-abríl tinan 2021 no iha Munisípiu Baukau no Vikeke to’o oras 23:59 loron 9 fulan-abríl tinan 2021.

Maske estudante sira ne’e foin lalais, governu no organizasaun Munisipal sira inklui mós asosiasaun balun fó ona ajuda hahán ba sira maibé loron sesta (02/04) maioria viola regra hodi hala’i liuhusi dalan tikus (ilegal), mak autoridade sira kaer iha Mota Hare, Postu Administrativu Rai Lako, Munisípiu Ermera hodi submete ba teste swab iha Gleno.

Tuir informasaun ne’ebé www.tempotimor.com asesu husi Vuce Ministru Interior, Antonio Armindo ne'ebe simu relatoriu badak husi Segundu Komandante Munisípiu Ermera Superintendente Assistante, Eduardo Campos hatete, sira simu Ermeraoan ne’ebé liuhusi dalan ilegal no parte saúde hala’o hela teste SWAB ba sira to'o kalan bo'ot.

“Ha’u hakarak relata de’it informasaun ba katak loron ohin parte Saúde Ermera ho PNTL Komandu Munisípiu Ermera iha Área Mota Hare, Postu Administrativu Rai Lako simu ema Ermeraoan sira maoria estudante husi Dili, liuhusi dalan tikus totál 500 pesoál resin no agora parte saúde halo ona Test Swap ba sira maibé seidauk hotu. Agora kontinua halo hela Swap ba sira”, informa nia.

Tanba ne’e, ekipa saúde Munisípiu Ermera kontinua halo atendimentu ba populasaun sira ne’ebé kontinua tama ba Ermera. No atendimentu teste swab kontinua halao to'o oras tuku 22:00 otl. Husi ne’e totál 232 ne’ebé hato uluk no iha tempu kalan tama tan 200 pesoál.

"Ekipa saude Ermera kontinua halo atendimentu ba populasaun ne'ebe kontinua tama mai Ermera," dehan pesoal saude ida iha fatin teste swab iha Gleno ne'ebe husu labele fo sai nia identidade.

Iha loron Sexta ekipa saude konsege halo teste ba ema hamutuk 232 no kontinua serbisu to'o kalan  hodi halo teste ba ema 200 seluk. (*)