Diretór Servisu Saúde Postu Hatulia, José Ximenes Martins, hanesan mós Reprezentante Administradór Postu Administrativu Hatulia hatete, Suku Coliate eletrisidade seidauk tama tanba veteranu sira mak impede dezenvolvimentu.
"Husu ba veteranu sira labele hasai malu, tanba ida ne'e dezenvolvimentu la la'o eletrisidade to'o iha Manulete de'it seidauk tama to'o mai Rearaga tanba inan aman tiu tia veteranu sira mak hasai malu”, dehan José iha Suku Coliate, kinta (14/10).
Tanba eletrisidade seidauk tama iha Suku Coliate impede mós servisu pesoál saúde sira-nia iha terenu tanba aimoruk vasina presiza tau iha fatin ne'ebé malirin.
Xefe Suku Manusae, Aurelianu Martins hatete, eletrisdade sira iha seidauk tama tanba veteranu sira mak impede hodi difikulta kompaña sira atu dada ba suku.
"Ida ne'e aman veteranu sira mak hatene ema mai ona atu dada maibé sira hasai malu entaun agora la mai tiha de'it”, dehan nia.
Dadaun ne'e, iha Timor-Leste suku hamutuk 70 resin mak seidauk asesu liña eletrisidade inklui mós aldeia balun iha Suku Coliate ho Manusae. (*)