Hafoin estudante sira ne’ebé husi kapitál Dili fila ba ida-idak nia munisípiu liuhusi dalan iregulár mak dadaun ne’e númeru kazu kontinua aumenta iha munisípiu Ermera, ikus mai parte autoriedade deside hodi suspende totál atividade aprendisajem iha munsípiu Ermera.
Tuir Sekretariadu Autoridade Munisípiu Ermera José da Costa Domingos katak, haree ba situasaun lor-loron ne’ebé transmisaun Covid-19 kontinua aumenta, mak tenki suspende atividade eskola sira, tamba atu halo prevensaun para labele kontinua da'et ba ema seluk.
"Horseik ha'u simu orden direita husi Ministru Edukasaun katak atu hasai sirkulár ida atu suspende prosesu aprendizajen hotu iha munisípiu Ermera, tanba ne'e konkliu ona sirkulár, ohin formalmente anunsia ba komunidade no estudante iha munisípiu Ermera katak hahú (10/4) suspende eskola sira nune'e hein desizaun Konselu Ministru bazeia ba pedidu Ministeriu Edukasaun," dehan José ba www.tempotimor.com iha Gleno, Sábadu (10/4).
Iha fatin ketak, estudante Sekundáriu Jerál Nino Konis Santana Gleno Nencia Oliveira Lay hatete, sente triste oituan kuandu suspende eskola hotu, maibé parte ida mós di’ak tanba atu halo prevensaun ba Covid-19.
“Suspende atividade eskola ne'e parte ida di’ak tanba bele prevene Covi-19 labele da'et ba estudante sira tanba eskola ne'e halibur ema barak, maibé impaktu mak estudante barak lakon materia husi manorin sira no laiha opurtunidade atu partisipa iha aula eskola nian, tanba ne'e husu ba parte edukasaun tenki buka mekanismu oinsá bele proteje ami nune'e bele asesu ba aprende, tanba estudante mak futuru nasaun no riku soin nasaun nian,” dehan Nencia.
Entretantu dadaun ne’e kazu Covid-19 iha munisípiu Ermera rasik sa’e ona ba 24. Tanba ne’e eskola hotu husi pre-primária to’o ensinu susperiór hotu iha munisípiu Ermera tenke para durante tempu balun no kontinua hein ba desizaun Konsellu Mnistru.(*)