Tanba Haree ba situasaun atual iha territóriu Timor-Leste ne’ebé loroloron lori ameasa boot ba vida povu no nasaun liuhusi dezenvolvimentu númeru pandemia covid-19 ne’ebé as ba bebeik iha semana ikus fulan-marsu ho númeru totál iha territóriu 500 liu.

Prezidente Autoridade Munisípiu Ermer, Jose Martino Dos Santos Soares informa, iha semana dahuluk fulan-abril tinan 2021 rejista ema 904 ne’ebé mak evakua husi Díli ba Ermer.

Maibé ekipa saúde Munisípiu Ermera foti ona amostra no envia ba Laboratóriu Nasional hodi halo analiza no ikus ema 904 hetan na’in-17 pozitivu Covid-19 no iha loron kinta (08/04) aumenta ema na’in rua mak pozitivu.

“Rejultadu pozitivu ema afetadu na’in-19 dadaun ne’e penetra ona iha Suku 52 no aldeia 276 iha Ita-nia Munisípiu. Iha teste uluk iha pozitivu 17 no ohin aument tan rua ne’ebé númeru hamutuk 19. Ema sira ne’e hela hamutuk ho nia família sira iha suku sira no agora tenke ba foti fali sira hodi ba Izolamentu”, afirma José ba www.tempotimor.com, kinta (08/04).

Tanba ne’e, autoridade Munisípiu Ermera konvida diresaun saúde, Komandante PNTL Munisípiu, Komandante F-FDTL Postu Gleno no Diresaun relevante sira inklui líder igreja katolika no CCLNME to’o iha konkluzaun atu evita no prevene moras covid-19 labele hada’et.

Ho ida ne’e, autoridade Munisípiu Ermera liuhusi reiuniaun iha loron kinta (08/04) deside ho aplika nafatin regra husi Organizasaun Mundiál Saúde nian, no nafatin limita movimentu sira ne'ebé la kontribui ba regra Estadu Emerjénsia nian hanesan.

Aliende ne’e Ekipa Integradu Covid Munisípiu identifika ho imediatu ema na'in 19 ne'ebé afetadu moras Covid-19 ne'ebé mak pozitivu ona lalais lori ona mai fatin izolamentu iha Munisípiu.

Iha mós Komandu PNTL Munisípiu, no Komandu F-FDTL postu Gleno nafatin rigor no alertadu durante horas 24 nia laran hodi mantein orden Autóridade nian tuir Lei EE.

“Autóridade Munisípiu Ermera ne'ebé kompoin husi dirasaun sivíl no militar inklui Igreija Katólika re-estabelese ekipa Covid Munisípiu nian ho imediatu hodi tun ba Postu-administrativu 5 hodi informa ba povo tomak katak, moras ka pesti Covid-19 númeru agora dadaun komesa dezemvolve a'as iha ita nia Munisípiu”, dehan nia.

Autóridade Munisípiu husu atu ema hotu nu'udár sidadaun responsável iha Munisípiu, iha dever morál atu intensifika konsiénsia ka hanoin di'ak atu labele jeneraliza fali situasaun ne'ebé Ia kontribui ba desizaun Autóridade nian ne'ebé mak ho objetivu atu proteze vida povu iha Munisípiu.

Nune'e mós, Diretór Saúde Munisípiu Ermera, Antònio de Deus hatete, daudaun ne'e saùde munisìpiu sei kria kondisaun ba pasiénte ne'ebè pozitivu ba Covid-19.

Ekipa saúde sei kontrola pasiénte Covid-19 hodi evakua ba sala izolamentu ne'ebè prepara ona. Tanba pasiénte sira ne'e sei iha postu administrativu Letefoho, Hatolia no Gleno. (*)