Login to your account

Username *
Password *
Remember Me

Servisu Buru-Kasar Muda Abílio Sai Empregadór

Abílio Maia ne'ebe pembantu tukang agora sai patraun iha nia kna'ar Abílio Maia ne'ebe pembantu tukang agora sai patraun iha nia kna'ar Foto Tempo Timor

Tempotimor (Ermera) - Moris iha mundu hanesan dezafiu ida ba ema hotu oinsá atubele halo mudansa iha ida-ida nia jornada, tanba moris la’ós fasil hanesan ema balun hanoin. Ho hanoin ne’ebé iha Ermeraoan Abílio Maia tenke pasiénsia hala’o no hasoru dezafiu hodi atinje mehi.

Maske la sai ema susesu liu iha mundu, pelumenus esforsu ne’ebé iha konsege muda nia moris husi buru-kasar sai fali empregadór hodi fó servisu ba ema balun.

Dezafiu no esforsu moris ne’ebé Abílio Maia iha konsege konta ba www.tempotimor.com iha Kamara Komersiu Indústria (CCI) munisìpiu Ermera, tersa (23/03) katak, husi prosesu moris ne'ebé hakur tempu lubuk ida, hahú ho servisu buru-kasar, Abílio Maia konsege sai patraun iha Munisípiu Ermera, tanba sosa ona karreta hamutuk 6, no hari’i loja ida hotu loke kampu servisu ba Timoroan balun.

Abílio Maia oan husi Trison Nono Maia ho Filomena Madeira, no moris iha loron 4 fulan-maiu tinan 1974, Suku Koilate, Postu Administrativu Ermera Vila, Munisípiu Ermera, ne'ebé dadaun kompleta ona tinan 47. Nia iha maun ho alin na'in 7, nia oan datolu husi Mane 4 no Feto 3.

Iha tinan 2001 Abílio iha vontade atu kontinua estudu, maibé la konsege, tanba iha altura ne’ebà situasaun ladun di’ak no laiha ekonomia ne’ebé nato’on atu suporta nia hodi kontinua estudu.

Maibé esforsu nafatin ho mehi ida katak hakarak susesu iha moris no lakohi tane liman ba ema, mak iha tinan 2002, bainhira prosesu konstrusaun ba Otél Timor Dili la'o namanas, nune'e Abílio deside husik hela nia kaben ho oan na'in-ida iha Ermera hodi tun Dili buka osan.

Abílio hahú buka moris iha kapitál nasaun nian (Dili), sai nu'udár ema pembantu ba badaen nian hodi kedok masa reboka ótel Timor iha tinan 2002. Ho servisu ne’ebé ema balun sente todan, maibé nia la interse ho hanoin ida mak bele sustenta uma laran.

Liuhusi Abílio nia servisu hanesan pembantu hetan osan rahun kada loron hetan dólar tolu, husi ne'e balun nia uza sosa hahán, sorin rai hamutuk to’o fulan konsege rai hamutuk dólar atusida-lima ($105).

Ho kosar ben rasik ne'e, Abílio hamosu hanoin ida katak, osan ne'e tenke haruka ba nia kaben hodi hala'o negósiu ki'ik ida iha rai moris fatin hodi fa'an fós rahun, sigaru, rinso, masin, masimidar no sona dosi.

Husi negósiu ne'e, Abílio nia kaben gosta liu atu produz dosi ne'ebé bai-bain hanaran pisang-goreng, tanba iha ambiente ne'ebé hala'o negósiu ba dosi mak kada loron rendimentu di'ak. Ho nune'e kontinua vontade hodi hala'o negósiu ki'ik ne'e, osan ne’e kada loron aumenta ba bebeik, maibè Abílio ho nia kaben nafatin esforsu maka’as.

Maske, servisu hanesan ema buru-kasar, maibé Abílio iha vontade tebes, tanba husi osan US$105 ne'ebé nia haruka nia kaben hala'o negósiu graças a Deus la'o di'ak tebes.

Nune'e sevisu buru-kasar iha Dili nia mantein nafatin to'o kompleta ba fulan 7, maske servisu la to’o tinan maibé Abílio deside fila hikas ba Ermera hodi kontinua negósiu ki'ik ne'ebé iha.

Ho kapasidade jestaun naton ne'ebé nia iha komesa rai osan sorin no sorin uza ba nesesidade uma laran.

Iha tinan 2002, Abílio komesa iha hanoin atu koa’lia ho patraun libra ne’ebè iha munisìpiu Ermera hodi tula na'an, patraun libra mòs simu Abílio sai belun di’ak hodi sira na'in-rua serviu hamutuk hala'o negósiu.

Husi ida ne’e mudansa tebes ba Abílio, maibè kuaze tinan 4 hamutuk ho patraun libra, iha tempu tuir mai patraun libra nia caban iha fatin ne’ebè Abílio hela bá komesa barak, entaun Abílio sente ladun di’ak, tanba kompetisaun (bersain) negósia ba malu.

Iha tinan 2006, Abílio muda hanoin hodi buka ema seluk atubele halo belun di'ak no konsege hamutuk fali ho patraun EDM ne’ebé besik malu ho patraun linbra antes Abílio servisu hamutuk.

Depois ida ne’e Abílio mòs iha osan rasik hamutuk dolar rihun-rua (US$2,000.00), entaun deside hodi koko mesak hala’o negósiu, maske iha dezafiu ne'ebé nia hasoru hanesan laiha karreta rasik atu tula naha hanesan negósiu iha tempu bailoron.

Tanba esforsu ne’ebé nia iha mak hola kafe no loke kios mais tenke aluga ema seluk nia karreta ho esperansa katak loron ida sei realiza mehi hodi sosa rasik karreta.

Ikus mai iha duni rezultatu, no iha tinan 2011 konsege sosa duni trek uzadu ida hodi bele fasilita nia atividade negósiu.

Ho ida ne’e, prosesu tuir mai Abílio kontinua esforsu hodi sosa tan karreta neen hanesan truk haat, baskulante ida no pazero ida, nune’e karreta no loja refere, ho lian Mambae nia hanaran (BHADIU BELS) signifika (nafatin badiu).

Ho esforsu hirak ne’ebé iha kontinua haraik-an servisu hamutuk nafatin ho ema balun inklui mos emprezáriu sira mak lori Abílio sai mós membru ida ba kamara komersiu Industria (CCI-TL) munisìpiu Ermera, hola parte ba negósia.

Abílio nia mensajen ba ema hotu katak, importante husi hili’i dalan negósiu pasiénsia ho esforsu-an, servisu labele sukat ita-nia kolen, no tenke halo belun di’ak ho ema hotu.

Abílio Maia ho nia kaben Joanina Boromeu dadaun iha oan na'in-7, mane 5, feto 2. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter