Sekretáriu Autoridade Munisípiu Ermera, José da Costa Domingos hatete, munisìpiu iha seriadade tomak hodi halo vizilánsia rigoruzu nune'e hamate peste covid-19 ne'ebé ameasa ba estadu Timor-Leste.
Tanba ne'e autoridade munisipal estabele postu permanente iha ne'e (Motahare) hodi dezinfekta ba transporte públiku no pasajeiru sira ne'ebé husi Dili ba Ermera.
"Ohin autoridade Munisípiu ho PNTL iha momentu krusiál, ita iha responsablidade tomak ba povu no labele tau fali grupu iha oin, ho ida ne'e se-se de'it tenke submete ba regra Organizasaun Mundiál ba Saúde (OMS) nian liuhusi Ministériu Saùde (MS), nune'e halo dezinfekta ba sidadaun hothotu”, dehan nia ba www.tempotimor.com iha Motahare, sesta (19/03).
Maibé, husu governu sentrál atu apoiu másimu ekipa PNTL no saúde munisípiu Ermera nian ne'ebé hatur ona iha pontu entrada refere.
Diretór Saúde munisípiu Ermera, António de Jesus Fatima hatete, materiál ba atividade dezinfekta nian, parte saúde munisípiu Ermera sufisiénte, hanesan máskra, brosura, termoscan inklui ekipamentu swab teste ba sidadaun sira.
"Ohin ami halo atividade lubuk ida hanesan halo desenfekta, termoscan, swab teste no halo promosaun saúde fahe brosura no vizitante sira ne'ebé liuba mai. Maibé iha koordenasaun di'ak ho parte seguransa no atividade refere tutela ba Prezidente Autoriedade iha responsablidade másimu”, esplika nia.(*)