Haree ba kondisaun povu nian, mak tempu udan mós inundasaun kontinua fó ameasa ba komunidade rihun 3.663 ne'ebé pertense ba suku Atara postu administrativu Atsabe.
Xefe suku Atara Angelmo Pereira hatete, inundasaun ne'e kauza husi udan boot ne'ebé akontese, nune'e ameasa ba komunidade sira inklui difikulta movimentu transporte públiku no privadu ne'ebé diresiona husi Bobonaru mai Ermera no husi Ermera ba Bobonaro.
"Ami presiza apoiu urjente, tanba ne'e husu ba Ministériu Obras Públika (MOP) atu hola médida iha tempu badak hodi haruka tékniku (eskapatór) ruma hodi hadi'a estrada refere, maibé se demora, entaun estrada no ponte ne'e aat totál”, dehan xefe suku ne'e liuhusi telefone ba www.tempotimor.com, kinta (18/03).
Alende husi inundasaun ne'ebé ameasa ba komunidade Atara, iha mós komunidade kuaze uma-ka'in 45 mak seidauk asesu liña eletrisidade husi tempu ukun-an to'o agora.
"La'ós inundasaun de'it mak ameasa ha'u-nia povu, maibé ha'u-nia komunidade uma-ka'in 45 husi aldeia Uabe mós seidauk asesu liña eletrisidade, entaun oinsa governu nia atensaun hodi responde, tanba ita hatene katak ita ukun-an tinan 19 ona, maibé dezenvolvimentu povu maiória mak la sente, maske governu iha programa hodi gasta de'it povu nia osan ho montante boboot de'it”, afirma nia.
Haree ba situassem komunidade nia mak rekomenda ba parte relevante oinsá bele tau atensaun ba komunidade ne'ebé seidauk asesu ba liña eletrisidade.
Entretantu suku Atara lokaliza iha postu administrativu Atsabe, munisípiu Ermera ne'ebé kompostu husi aldeia neen, mak hanesan aldeia Airae, Batugala, Daubere, Mania, Kapouabe no Uabe, ne'ebé ho totál populasaun rihun 3.663.(*)