Prezidente CCI-TL munisípiu Ermera, Luis Alves Tilman hatete, emprezáriu ne’ebé rejistu ona iha CCI-TL hodi sai hanesan membeu hamutuk 1.727, ne'ebé fahe ba divisaun oioin.

"Emprezáriu sira ne'ebé rejistu iha CCI-TL ne'e fahe ba divizaun lubuk ida, hanesan hala'o negósiu iha mikro empreza, loja, restaurante, Guesthouse maibé barak liu mak konstrusaun sivíl, tambá ne’e setór dezenvolvimentu iha munisípiu kona-ba konstrusaun sivíl dependente ba projetu governu nian, maibé agora Timor-Leste afeta hela Covid-19, nune’e impede dezenvolvimentu, maibé konstrusaun balu prosesu la’o normál”, dehan Luis ba www.tempotimor.com iha nia kna’ar fatin, tersa (16/03).

Emprezáriu sira dalaruma hasoru dezafiu mak hanesan ema ne’ebé sosa produtu menus depois iha hela pandemia, entaun nune’e afeta ba buat barak, maibé na'in ba empreza, la lakon esperansa hodi hala’o nafatin kna’ar refere oinsá promeve dezenvolvimentu lokál iha munisípiu.

“CCI-TL munisípiu Ermera, prepara no fasilita formasaun bá membru sira inklui servisu hamutuk ho ILO no CCI-TL nasionál ne'ebé iha hela programa ida ho naran TOT hodi hetan suporta husi ILO no IADE. Nune’e iha fulan-abril nia laran iha formasaun ba grupu no alvu iha munisípiu hahú ona kona-ba oinsá prepara dokumentu ruma no fó advokasia karik empreza sira iha difikuldade impostu no karta lisensa, CCI-TL presiza falisita”, dehan nia.

Entretantu CCI-TL Munísipu Ermera servisu hamutuk ho autoriedade munisipál hetan despaxu husi Ministru Koordenadór ba Asuntu Ekonomia (MKAE), entaun ho ida ne’e Prezidente Autoriedade Munisipál fó kompeténsia ba CCI-TL Ermera atu deside emprezáriu ne’ebé atu ba sosa fós iha Sentru Lojístika Nasionál (SLN) hodi halo intervensaun ba merkadu tanba presu sasán iha merkadu folin hahú sa'e.

"Situasaun ida ne’e empreza balu politiza folin sasán, tanba ne’e iha semana ne’e nia laran CCI-TL ho SLN sei prepara fós hodi atende ba polulasaun sira ho presu normál”, reforsa nia.(*)