Tuir Leonardo do Santos Babo nu'udar vitima ba reabilitasaun estrada ne'e hateten, ami komunidade nia uma hetan estragu totál husi kompañia Shanghai, maske halo reabilitasaun ba estrada la tuir BOQ governu nian.

"Projetu ne’e kompañia halo, sira la prepara barajem ruma nune’e bele satan netik bee bainhira udan boot inklui mós kareta fuju boot ne’ebé husi kompania movimentu ba mai halo rai dodok entaun fó ameasa tebes mai ami, tanba rai halai halo uma mós atu monu ona," dehan Leonardo ba www.tempotimor.com iha suku Poetete, Kuarta (10/3).

Komunidade ne'e husu ba governu no kompañia Shanghai atu toma atensaun ho imediatu ba situasaun ne'e.

“Ami presiza liu-liu estadu ho kompañia tenke tau matan lalais halo barajem ruma hodi satan netik ami-nia uma, selae lakleur tan ami-nia uma bele monu hotu tamba rai halai impaktu husi kompañia ne’ebé laiha responsabilidade,” dehan nia.

Leonardo afirma, komunidade sida iha aldeia vila suku Poetete ne'e hela komesa 1975, ne'ebé bele udan boot mós la estraga fatin refere, maibé hafoin kompañia ne'e halo reabilitasaun ba estrada ne'e no la prepara bee dalan ho di'ak ikus mai udan boot, halo rai monu fó risku ba komunidade sira.

Iha fatin hanesan xefe suku Poetete Felisberto das Neves katak, projeitu reabilitasaun ba estrada diresaun Ermera vila ba Hatolia B ne'ebé kaer husi kompañia Shanghai ne'e laiha kualidade.

"Projeitu to'o agora ne'e laiha kualidade di'ak, tamba halo baleta ho médida kiik liu no estrada la atiru ho rai-henek, tambá ne’e fó ameasa ba kumunidade uma-ka'in neen ne’ebé hela besik estrada, entaun sira agora dadaun iha ameasa nia laran," katak Xefe suku ne'e.

Autoriedade lokál ne'e subliña, maske estrada refere seidauk tau alkatraun, maibé tenke ateru nune'e bee labele nalihun.

“Estrada ne’e pelumenus sedauk tau aspal ne’e atiru netik no fakar rai nune’e bee labele nalihun iha estrada laran, maibé realidade laiha tambá ne’e mak wainhira udan mai be’e halai la tuir nia dalan hodi fó impaktu ba komunidade sira,” nia esplika.

Reprezentante povu ne'e husu ba Ministériu Obras Públika (MOP) iha munisípiu Ermera labele ko'alia de’it iha fatin, maibé tuun ba baze hodi observa saida mak akontese iha baze.

Entretantu, husi parte autoridade lokál sira rekomenda bei-beik ona ba patraun Shanghai, maibé nia parte lakohi koopera. Depois estrada refere halo ona durante tinan rua maibé to'o agora seidauk finaliza.(*)