Prosesu aprendizajen iha eskola NOSSEF nafatin implementa regras prevensaun ba moras Covid-19, ne'ebé fó sai husi Ministériu Saúde (MS), no Organizasaun Saúde Mundiál (OMS), hanesan fase liman bei-beik ho sabuna, uza maskra, distansia sosiál, no seluk tan.

Tanba ne'e, parte eskola NOSSEF nafatin prepara bee, no sabaun atu fase liman, maibé maskra kada estudante ho konsensia rasik hodi prepara.

Presiza duni ho konsensia hodi hala'o tuir regras prevensaun, tanba moras Covid-19 ninia risku perigozu tebes ba ema nia vida.

Diretòr Eskola Sekundària Jeráleral Katòlika Nossa Senhora de Fatima Railaku (NOSSEF), Hyoe Murayama hatete, nafatin oriènta manorin-na'in, no estudante sira hodi kumpri ou implementa regras prevensaun Covid-19 iha prosesu aprendizajen.

"Husi Janeiru to'o agora, eskola ne'e rasik halo tuir desizaun Ministériu Edukasaun, Saùde no Governu nian oinsa evita aan husi Covid-19, professores no estudante, tenki uza maskra, fase liman no distansia sosiàl," Dehan Nia ba Tempotimor iha kna'ar fatin Railaku, Teresa (9/3).

Estratéjia Eskola NOSSEF nian ne'ebé implementa iha prosesu aprendizajen atu prevene moras Covid-19 maka, fahe estudante sira ba grupu rua, nune'e kada semana grupu rua ne'e troka malu tama aula.

"Ami fahe grupu, kada turma ida fahe ba grupu rua, semana ida estudante rua nunu (20) mak tuir aprendizajen no semana ida fali grupu seluk fali", Nia afirma

Ho meius ne'e, ho hanoin ida atu implementa regras prevensaun Covid-19 ho di'ak iha prosesu aprendizajen.

Bainhira parte governu hasai despaixu ida hodi hapara prosesu aprendizajen temporariamente, eskola NOSSEF prontu kopera.

"Agora daudaun iha Dili laran maioria eskola hotu taka ona, nune'e husi eskola ne'e rasik fò atensaun liu bá Edukasaun Munisípiu Ermera nian, bainhira simu despaixu ruma fò hatene estudante sira estuda iha uma, no karik orienta ami provizoriu taka eskola ami halo tuir", Nia afirma

Nune'e mós Catia Andrade Matias Mendes nu'udár estudante iha eskola NOSSEF akresenta, durante ne'e ami estudante hotu ho konsiensia hala'o tuir medidas prevensaun bá Covid-19, ne'ebé husi parte saùde nian fó sai, tanba konsidera moras ne'e perigu tebes.

"Diretòr eskola, professor no professora sira mòs fahe imformasaun mai ami oinsa prevene aan husi moras ne'e, tenki hala'o tuir protokolu husi organizasaun Saùde Mundiál (OMS) nian, tanba ne'e, iha eskola prepara ona bee, ,sabaun no maskra, nune'e estudante sira bele uza, maibè kona-bá maskra ami estudante hotu iha nian rasik, tanba konsidera moras ne'e fò ameasa ba saùde", Dehan nia

Totál estudante iha eskola NOSSEF hamutuk na'in 375, no totál manorin-na'in iha 26. (*)