Tuir eis administradór postu administrativu Letefoho Adolfo Soares katak, problema ne'ebé durante ne'e povu Letefoho infrenta mak estrada, tanba tempu udan transporte labele movimentu tanba estrada aat ona.
"Ami iha ne'e estrada mak ladi'ak, tempu udan hanesan ne'e, sá tan agora husi Gleno ba mai to'o Goulolo ne'e sei di'ak. Mais husi Goulolu atu ba fali Letefoho vila mós dalan komplikadu loos, kareta kiik sira ne'e dalaruma to'o tempu, labele ba, ne'e dalan aat," dehan Adolfo iha Suku Goulolo, munisípiu Ermera, Sesta (26/2).
Nia hatutan, molok ne'e ekipa husi Ministériu Obras Públika (MOP) liuhusi Institutu Jestaun no Ekipamentu (IJE) atu ateru, maibé to'o agora seidauk realiza.
"Tuir informasaun katak, estrada ne'e tinan oin ADB mak sei loke estrada ne'e atu tembus ba Hatubuiloco, mais ne'e tuir informasaun, to'o agora seidauk realiza," nia preukupa.
Iha fatin hanesan, xefi Suku Goulolo, Joaquim Soares katak, durante Timor-Leste ukun-aan to'o oras ne'e, kondisaun estrada iha nia suku rasik, aat ba bei-beik tanba governu laiha seriedade atu hadi'a dalan ba sira suku refere.
"Ha'u sente preukupa tanba estrada iha ne'e aat nafatin, komunidade sira atu lori produtu kafé ba merkadu mós la'o lori tempu oras haat to'o lima, tanba estrada ladi'ak. Ha'u husu ba governu ida ne'e, atu iha tinan ida bele hadi'a ona ami estrada", dehan nia.
Entretantu, Postu administrativu Letefoho kompostu husi suku ualu, aldeia 67 ho totál populasaun rihun 28.225 no maioria populasaun moris ho vida agrikultór.(*)