Elizário nia esperiénsia katak, bainhira sei sai hanesan lideransa ba kooperativa kréditu Federasaun Hanai Malu (FHM), husi kooperativa 70-resin ne'ebé molok ne'e eziste iha TL, sira ne'ebé susesu liu maka ninia dirijente ne'e maioria ema profesór sira.

"Hahú ho kooperativa kréditu, ha'u-nia rekomendasaun, ha'u husu sé bele hahú husi profesór sira, tanba kooperativa kréditu ne'ebé susesu iha timor ne'e, profesór sira," diskursu Sekretáriu Estadu Kooperativa (SEKoop), Elizário Ferreira, iha atividade sensibilizasaun kona-aba lala'ok kooperativa nian iha Salaun Kapelaun, Suku Goulolo, Postu Administrativu Letefoho, sesta (26/02).

Na husu ba profesór sira eskola idak-idak bele promove ba hari'i, kooperativa kréditu, no SEKoop hele delega ekipa ida tún hodi fó formasaun hodi kuñesimentu kona-ba kréditu nian.

Maske nune'e, reprezentante Administradór Postu Administrativu Lotefoho, Adolfo Soares haktuir, bainhira nia asume kna'ar nu'udár administradór postu, nia mós halo ona negosiasaun ho parseiru internasional balu hanesan Mercy Corps atu hamutuk ho komunidade bele ke'e kolam, hodi hakiak ikan, maibé ohin loron komunidade maioria mak nia hanoin sei dependente liu no lakohi kria inisiativa rasik ba aan.

"Ida-ne'e mak kestaun ida, tanba mentalidade ne'e. Agora, oinsá atu muda ema-nia mentalidade ne'e, presiza muda ka presiza buat ida sensibilizasaun, atu sira bele iha komprensaun," dehan nia.(*)