Print this page

PR Lú Olo: “Nasaun Presija Ema Matenek”

By November 20, 2020 1465
Estudante sira ka'er bandeira RDTL wainhira simu PR Lu Olo iha Gleno (17/11) Estudante sira ka'er bandeira RDTL wainhira simu PR Lu Olo iha Gleno (17/11) Foto Midia PR

Tempotimor (Ermera)- Prezidente Repúblia (PR), Francisco Guterres Lú Olo fó atensaun katak, nasaun atu ba oin presija ema matenek.

Atensaun ne’e PR Lú Olo alarma ba estudante sira bainhira hamutuk ho espoza Cidália Nobre Mouzinho Guterres hala’o vizita ba iha Eskola Báziku Centrál (EBC) 10 Abril 1999 Gleno-Ermera, Kuarta (18/11).

“Ha'u hakarak atu hateten ba imi katak, tenke iha formasaun kontinua, profesór sira tenke la'o nafatin atu akompaña oan sira to’o iha nível boot liu, to’o iha nível universidade tanba ita nia nasaun atu bao in, ita presija ema matenek”, PR Lú Olo hateten.

Nia hatutan, maske TL hanesan nasaun ida ne’ebé kiik, maibé tenke hatudu ba mundu katak Timoroan mós matenek no bele.

Ho liafuan atensaun ida ne’e maka, Xefe estadu kuda hela ai horis ida maka rambutan, hanesan sinál ida katak, kualidade edukasaun sei idéntiku ho ai horis ida, bainhira la rega no la kuidadu husi loron ba loron ai sei mate, hanesan mós edukasaun presija atu aprende no kontinua aprende, labele para.

"Ho haksolok tebes mak ohin ha’u liuhusi imi-nia eskola ho oan no profesór sira. Ha’u hakarak husik hela de'it liafuan ida ba imi alunu sira no profesór sira, ha'u kuda hela ai oan ida no ai ne'e naran rambutan. Ha’u hakarak kuda ai ne’e iha eskola ne'e hanesan kuda kualidade eskola ensinu iha aprendijazen," PR Lú Olo hateten.

Antes atu taka diskursu, xefe estadu ne’e dezeza susesu ba estudante no profesór sira hotu iha eskola EBC 10 Abril 1999 Gleno-Ermera ne'ebé iha hela faze ezame finál. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com