Durante diálogu ho povu Ermera iha salaun parokial Gleno, António de Sousa aprezenta aan ba povu Ermera katak, esperiénsia ne’ebé nia iha, mesak nível internasionál de’it.

“Primeiru ema dahuluk ne’ebé hala’o estudu nu’udár enjiñeiru ba mina nian iha Indonézia ne’e mak ha’u. Enjiñeiru Timor-oan dahuluk ne’ebé maun Xanana fiar hodi ba tuir enkontru ho malae Australianu sira, ne’e mak ha’u. Ba aprende hodi mai fali ema labele bosok ita. Sai sasin hodi ko’alia ba ita-nia povu no estadu,” António de Sousa deklara-an perante povu Ermera.

António mós konta ninia estudu seluk katak, nia mós hetan bolsu estudu iha Austrália depois servisu tinan barak iha nasaun boot França no seluk tan.

“Ha’u servisu tinan barak iha França, Amérika, Sudeste Aziátiku inklui rai seluk tan, depois fila mai TL hodi kontribui ba dezenvolvimentu petrolíferu. Maibé ita-nia problema mak susbtituisaun ka rezerva, katak, kampu ida atu hotu, tenke rezerva fali atu foti, maibé felismente ita zero,” António konta tuir ninia esperiénsia servisu.

Lider másimu Timor Gap foun ne’e mós akresenta katak, TL tenke esforsu maka’as atu bele hetan fali substituisaun seluk bainhira mina maran.

“Ita tenke esforsu maka’as atu bele identifika fali fontes foun ne’ebé ita bele dezenvolve, tanba to’o agora, ha’u tenke onestu to’o faze agora seidauk iha prova katak, ita-nia petróleu ne’e eziste, teknikamente seidauk iha, atu dehan mina maran ne’e seidauk, tenke halo estudu ida kle’an no halo tiha perfurasaun mak foin dehan mina ne’e eziste,” nia hakotu.

Komunidade ida ne'ebe marka prezensa mos iha fatin ne'eba, husu www.tempotimor.com labele fo sai nia identidade, dehan, "Senor ne'e foti-a'an los." (*)