Tempotimor (Dili) –  Koordenador Gabinete Apoiu Sosiedade Sivíl (GASS), Filipe da Costa afirma, GASS sei hapara ajuda ba konstrusaun igreja foun iha 2020.

“Ba tinan 2020, sei la iha fundus ba projetu foun igreja nian. Tanba projetu konstrusaun igreja nian dadaun ne'e, sidauk remata. Entaun, nafatin kontinua konstrusaun to'o tinan oin,” Filipe informa iha Palásiu Governu, Segunda (14/10/19).

Tuir Filipe, fundus ne'ebé  atu halo konstrusaun igreja foun Governu transfer tiha ona ba Konferensia Episkopal. Ne'ebé, nia dehan tan, ba tinan 2020, GASS so tau dei't osan uitoan ba konstrusaun igreja hirak ne'ebé mak seidauk remata.

"Relasiona ho fundus ba konstrusaun igreja, ezekuta iha parte rua. GASS fó ona uluk %40 ba implementa. Depois entrega tiha relatóriu, hafoin fó tan %60 atu ezekuta tan ba oin. Maibé, ate agora husi projetu igrjea hirak ne'e, sira sidauk entrega relatoriu ba %40 nian," tenik Filipe.

Nia subliña, iha tinan 2019 GASS hetan orsamentu hamutuk besik millaun $6 no iha orsamentu ne'e aloka ba organizasaun sosiedade sivíl ho montante $300 mill resin, organizasaun rezistensia millaun $1.5 no Sentru Nasional Chega millaun $1.5 no restu ne'e ba organizasaun relijiozu sira.

"Tuir envelope fiskál ba tinan 2020 GASS nian ho montante millaun $7. Fundus ne'e atu halo kontinuasaun ba konstrusaun igreja ne'ebé seidauk remata nomos balun fó apoiu ba servisu organizasaun sosiedade sivíl nian," Filipe dehan.

Tempotimor (Dili) – Governu Austrália promete, hakarak kontribui ba dezenvolvimentu ekonomia no promove komérsiu iha Timor-Leste.

Embaixadór Austrália, Peter Robert informa kestaun ne'e ba jornalista hafoin hasoru Primeiru Ministru Taur Matan Ruak iha Palásiu Governu, Dili, Sesta (06/12/19).

"Ha'u hakarak koopera ho Timor-Leste nia dezenvolvimentu no hakarak promove mós komersiu," hatete Peter Robert ho lian Tetum.

Embaixadór ne'e dehan, iha relasaun di'ak entre Timor-Leste ho Austrália. Tan ne'e, presiza servisu hamutuk, hodi hadi'a dezenvolvimentu ekonomia iha Timor-Leste ho di'ak liután.

Iha parte seguransa nasaun rua ne'e, tuir Peter, la'o di'ak ona. Nune'e, Austrália hakarak kontribui mós  iha parte ekonomia hodi dezenvolve Timor-Leste.

Peter garante, ba futuru kontinua servisu hamutuk ho nasaun Timor-Leste, hodi haforsa dezenvolvimentu ba susesu.

Tempotimor (Dili) – Autoriedade Nasionál Petroleu no Minerais (ANPM) hamutuk ho Komisaun D Parlamentu Nasionál hahú deskute kona-ba Projetu Lei Miñeiru (PLM) ne'ebé atu regula ba atividade minarai nian.

"Ami mai fó hanoin ba Komisaun D Parlamentu Nasionál, tanba iha semana hirak liubá ami simu ona esbosu lei ne'e husi komisaun D. Entaun ami mai halo esplikasaun ba deputadu sira kona-ba projetu Lei Minerais ne'e," dehan Prezidente ANPM, Gualdinho da Silva iha PN,  Kuarta (02/10/19).

Nia esplika, kontéudu husi projetu Lei Miñeiru ne'e mak atu halo regulamentu ba atividade minarai nian.

"Kontéudu projetu ne'e mak oinsá atu regula atividade minéirus ba minarai hotu-hotu. Hahú husi peskiza, halo estrasaun kuandu atividade minarai ne'e hotu, no halo reabilitasaun ba fatin minas ninian," Gualdinho esplika.

Iha projetu lei ne'e iha mós tipu lisensa kona-ba ba minerais sira ne'ebé iha valór ekonomiku kiik, nomós indústria no minerais ne'ebé iha valór ekonomiku ne'ebé boot, no lei ne'e rasik sei regula de'it miñeiru iha rai maran.

Iha fatin hanesan Prezidente Komisaun D, deputada Virginia Ana Belo katak projetu Lei Miñeiru ne'e importante tebes. Tanba Timor-Leste depende ba fundu minarai.

"Projetu Lei Miñeiru ne'e importante tebes. Tanba durante ne'e dependensia estadu nian ba fundu petrolífeiru. Entaun saida mak ita bele buka hodi bele hetan reseita ida tan. Ita iha rekursu ne'ebé barak iha rai laran ne'ebé sei husi petrolífeiru," tenik Prezidente Komisaun D PN ne'e.

Deputada ne'e mós espera katak husi estudu Institutu Petroleu no Jeolojia (IPG) ne'ebé deteta ona rekursu barak, nune'e Timor-Leste bele hetan reseita doméstika.

 

Tempotimor (Dili) – Ministru Defeza no Seguransa (MDS), Filomeno da Paixão de Jesus, propoin ona atu estabelese tan postus 30 kada tinan to'o 2023.

"Kona-ba postu nian, ita presiza tan postus 30 ba suku.  Tanba durante ne'e, Nova Zelândia mak halo ona postus 14. Entaun, daudaun ita presiza aumenta tan 30 postus. Maibé fahe ba postu hotu-hotu, no presiza tau postu iha fatin ida ne'ebé mak aktividade ilegais no konflitu sira la'o hela ba," dehan MDS iha Ministériu Interiór, Sesta (27/09/19).

Ministru afirma katak, polítika ne'ebé iha, presiza halo postu hamutuk 452. Maibé, tanba orsamentu menus, entaun kada tinan sei estabelese de'it postus 30.

"Ita sei halo postu hamutuk 452. Maibé ita nia osan ne'ebé limitadu, entaun kada tinan halo postu 30, hein katak to'o tinan 2023 bele halo hotu ona," afirma MDS.

Alende ne'e Ministru mós relata kona-ba konstrusaun ba edifísiu Polísia Nasionál Timor-Leste (PNTL) nian, ne'ebé sei hahú konstrusaun iha tinan oin mai ne'e.

"Konstrusaun ba edifísiu PNTL nian, hetan ona rezultadu pozitivu husi Konsellu Ministru atu tau osan millaun $2 resin. No konstrusaun tuir loloos konstrui ona iha tinan ne'e. Maibé, durante iha trimeste ikus ne'e adianta fali ba tinan oin hafoin hahú," Filomeno haktenik.

Tempotimor (Dili) – Primeiru Ministru Taur Matan Ruak hatete, Siméira Petróliu no Gas nu'udar jornada foun ba Timor-Leste, hodi atinje metal ne'ebé mak iha, kona-ba povu nia moris di'ak.

"Eventu ne’e reprezenta marka importante ida iha jornada Timor-Leste nian atu bele sai nu’udar destinu preferensiál ba negósiu sira no investimentu iha Sudeste Aziátiku, iha área esplorasaun no produsaun petróleu no gás nian," hatete Primeiru Ministru Taur Matan Ruak iha ninia diskursu iha Centru Convensoens Dili (CCD), Kinta (03/10/19).

PM Taur dehan, ho númeru partisipante ne’ebé barak tebes, sai hanesan prova ida katak Timor-Leste sai nu’udar destinu preferensiál ba negósiu sira no investimentu.

Xefe Governu ne'e fiar, iha tinan balun ne'ebé sei mai, ema hotu sei hanoin katak ohin nu'udar loron istóriku ba Timor-Leste.

"Ami fiar katak, hahú ohin ba tinan balu tan, ema hotu sei hanoin katak loron ida ne’e, nu’udar loron ida ba determinasaun no responsabilidade. Ne’ebé, deside tiha ona dalan sira ba Timor-Leste hodi alkansa ninia rekoñesimentu ne’ebé maka nia merese duni, hanesan autór importante ida iha indústria internasionál petróleu no gás nian," dehan TMR.

Nia afirma, siméira dahuluk ne’e kona-ba Petróleu no Gás Timor-Leste nian akontese daudaun iha momentu ida krusiál ba TL nia dezenvolvimentu, progresu no modernidade.

"Ita konsege to’o akordu ida ho ita-nia país vizinhu, Commonwealth Austrália nian, kona-ba estabelesimentu fronteira marítima ida ne’ebé permanente entre nasaun rua. Nune’e, taka ona kapítulu ida ne’ebé importante tebetebes ba ita-nia istória, ne’ebé dura tempu barak nia laran," nia komenta.

Esforsu ne'ebé nasaun rua ne'e halo, tuir PM Taur, atu lori povu ba moris di'ak.

"Esforsu estraordináriu ne’ebé hala’o ona husi país rua ne’e, hodi alkansa Tratadu Fronteira Marítima foun no aseitasaun jerál tratadu ne’e nian, hatudu katak nasaun sira bele hakat liu difikuldade polítika atu buka interese di’ak liután ba sira-nia povu," tenik PM Taur.

Tempotimor (Dili)- Komisaun Revizaun Orsamentu Jerál Estadu (KR-OJE) aprova orsamentu tokon rua resin ba Ministériu Koordenadór  ba Asuntu Ekonomiku (MKAE) ba tinan 2020.

"Ohin Ministériu Koordenadór ba Asuntu Ekonomiku (MKAE) aprezenta proposta orsamentu tinan 2020 nian, ne'ebé hetan apresiasaun pozitivu husi Komisaun Komite Revizaun Orsamentu (KKRO). Ne'e, hatudu rezultdu ne'ebé di'ak. Hein de'it faze tuir mai ba iha Parlamentu Nasionál," dehan Ministru Koordenadór ba Asuntu Ekonomiku interinu, Fidelis Leite Magalhães iha Ministériu Finansas, Kinta (12/09/19).

Nia dehan, orsamentu ne'ebé Governu preve ba MKAE hamutuk milioens rua resin. "Agora, sei iha diskusaun finál ne'ebé pur volta milioens rua resin (US$ 2 Milioens) no orsamentu adisionál ba tinan ida nian ho pakote $700.000," Fidelis Informa.

Ministru interinu ne'e mós halo estimasaun ba orsamentu ne'e.  Nia dehan, importante liu mak milioens US$ 1.5

"Diskusaun ne'ebé ohin ami aprezenta ne'e pur volta tokon rua resin. Maibé, ha'u rasik horikalan no ohin dadeer tetu no razoavel liu maximu milioens US$ 1.5 mak iha ne'ebá. Tantu, prepara adezaun Timor-Leste nian ba Organizasaun Mundial Komérsiu no prepara ba apoiu ne'ebé ita fó liuliu ba kapasitasaun iha seitor ekonomiku nian," nia esklarese.

Fidelis fiar katak, iha tinan oin MKAE sei servisu di'ak liután ho Kámara Komérsiu no Indústria Timor-Leste (CCI-TL), ba kapasitasaun seitor privadu.

Programa importante MKAE nian iha tinan 2020 nian, mak ba organizasaun mundiál  komérsiu, servisu hamutuk ho CCI-TL, kapasitasaun iha MKAE nia laran hodi eleva planu MKAE nian iha futuru.

Tempotimor (Dili) – Primeiru Ministru Taur Matan Ruak, lamenta ho atetude juventude ne'ebé la respeita malu, hodi halakon maluk seluk nia vida.

"Ita lamenta ida ne'ebé mate. Ita hein katak aban bainrua labele akontese-tan. Buat hotu ne'ebé halo ho insisiativa no respeita ba malu, labele provoka malu, tanba vida ida lakon ne'e, vida ne'ebé falta. Tanba ne'e lamenta teb-tebes," tenik Primeiru Ministru Taur Matan Ruak iha Palásiu Prezidensiál, Bairru-pite, Kinta (26/09/19).

Xefe Governu ne'e mós afirma katak,  kazu ne'e kriminál entaun justisa mak sei la'o.

"Kazu ne'e kriminál ne'ebé prosesu justisa mak la'o iha kualker forma. Maibé, situasaun kontroladu iha tempu ne'ebá tanba ita nia Polísia Nasionál Timor-Leste halo servisu di'ak. Nune'e, situasaun kontroladu no ema hotu la'o hanesan bai-bain," dehan PM Taur.

PM mós ilojia ba servisu Polísia Nasionál Timor-Leste ne'ebé hala'o servisu di'ak no lalais hodi rezolve situasaun hodi labele hada'et tan iha fatin seluk.

Lamenta Beibeik

Iha fatin seluk, Domingos da Cunha, komunidade Comoro ba tempotimor.com hatete, Governu presiza buka solusaun ne'ebé klaru kona-ba problema hanesan ne'e.

“Governu presiza buka solusaun, para bele hakotu no minimiza buat hirak ne'e. La'ós hotu de'it ho estetementu lamentasaun beibeik,” afirma Domingos, iha loja Lider nia oin, Kinta (26/09/19).

Alende ne'e, Domingos mós kestiona ho servisu PNTL nian, ne'ebé tuir nia, sei dook husi profesionalismu. Nia fó ezemplu kazu Ai-mutin ne'ebé nia dehan to'o agora seidauk kaer autór ne'ebé oho vitima iha konfrontu ida akontese iha Segunda (23/09/19) liubá ne'e.

“Ida polísia kaer mak autór ne'ebé inklui mós iha konfrontasaun ne'e. Maibé, se mak oho vitima ne'ebé mate iha momentu akontesementu ne'e, to'o agora públiku lahatene,” nia dehan tan.   

Tempotimor.com nota katak iha inisiu tinan ida ne'e de'it, mosu konfrontasaun ne'ebé inkliña arte marsiais iha Munisípiu Baucau (dala 2) nia rezultadu hamate no hakanek ema balun no estraga sasán. Iha Munisípiu Likisa, na'in 2 mate no lubuk ida kanek, estraga uma barak no ema liu 100 sai refujiadu. Iha Kapitál Dili ataka malu iha Beto, Comoro no ikus liu ataka malu, Segunda (23/09/19) iha área Ai-mutin ne'ebé rezultadu na'in 1 mate no na'in 2 kanek todan.

Tempotimor (Dili) – Sekretáriu Estadu Juventude no Desportu (SEJD), Nelio Isaac Sarmento informa, iha orsamentu hamutuk millaun $4.5 atu fó apoiu ba komunidade ka grupu joven sira, hodi dezenvolve ekonomia iha sira-nia suku.

Nia subliña, Sekretáriu Estadu Igualdade Inkluzaun (SEII) iha millaun $1.5, Sekretáriu Estadu Arte no Kultura (SEAK) iha Millaun $1.5 no SEJD iha millaun $1.5. “Entaun, orsamentu hamutuk millaun $4.5 atu implementa programa ba komunidade iha tinan 2020,” nia esplika.

Apoiu ba suku hirak ne'e, nia dehan, la'ós hanesan subsídiu ida hodi moris beibeik. Maibé, ne'e hanesan subsídiu la permanente ka temporaria.

"Orsamentu hirak ne'ebé apoiu ba grupu sira iha suku ne'e, uza hanesan kapitál ba dezenvolvimentu. Maibé, tenke fó fila. Se la fó fila mak sei simu responsabiliza i la hetan tan oportunidade hodi asesu ba oportunidade tuir mai, ne'ebé  Governu fó," esplika SEJD iha Palásiu Governu, Sesta (25/10/19).

Nia informa, koloka orsamentu atu apoiu ba grupu joven liuliu ba feto sira ne'e, subsídiu temporaria para sira bele uza hodi dezenvolve ekonomia iha sira-nia suku rasik.

Tempotimor (Dili) – Terminal ba transporte públiku iha Kapitál Dili sai preokupasaun públiku. Terminal hirak ne'ebé durante ne'e Governu halo rehabilita, barak mak la funsiona tanba kondisaun ne'ebé ladi'ak.

Tuir Ministru Transporte no Komunikasaun (MTK), José Agustino da Silva, konstrusaun terminal ba transporte públiku iha parte Hera, Manleuana no Tibar sei iha prosesu estudu viabilidade.

"Dadaun ne'e, sei iha prosesu estudu viabilidade hela. Liuhosi estudu ne'e, sei define kustu hira. Klaru katak ne'e planu Governu nian. Nune'e, iha tinan 2020 ne'e ita hahú ona. Tanba ita iha estasaun rejionais nian. Entaun, parte Leste nian sei halo iha Hera, parte rai klaran nian sei halo iha Manleuana no parte Oeste nian sei halo iha Tibar," dehan MTK iha Palásiu Governu, Kuarta (13/11/19).

MTK afirma, husi vantajem tau terminal ba transporte públiku iha fatin hira ne'e, bele loke luan tan  Sidade Dili.

"Vantajem ba ita mak loke tan espasu Dili nian, halo luan. Ne'ebé fó espasu ba ita nia transporte públiku nia movimentasaun no parte ida, bele aumenta sira nia kresimentu ekonomia," haktuir José.

Entretantu, hatán kona-ba totál orsamentu ne'ebé prevé ba konstrusaun terminal hirak ne'e, MTK la fó sai. Nia so hatete de'it katak projetu ne'e prevé iha 2020.

“Tanba halo modelu terminal oinsá, presiza osan hira, se mak halo ne'e ita seidauk hatene. Ne'ebé depende ba estudu viabilidade," José afirma.

Tempotimor (Dili) – Komunidade Suku Madohi, liuliu sira ne'ebé hela iha Aldeia Anin-Fuik, Aldeia 7 de Setembru no Aldeia Rosário, husu ba estadu atu bainhira hasai populasaun husi rai estadu nian, presiza halo uluk registrasaun.

“Komunidade iha intensaun atu kontribuisaun ba dezenvolvimentu Timor-Leste nian. Maibé, presiza mós konsiderasaun husi estadu no Governu,” hatete komunidade Silveiro da Costa iha Sede Aldeia Anin Fuik, Beto, Dili, Kinta (19/09/2019).

Nia dehan, prosesu atu halo registrasaun ba komunidade ne'ebé okupa rai estadu nian ne'e, tenke kria uluk enkontru, atu ema hotu bele hato'o nia hanoin. Hafoin foti desizaun hodi hasai komunidade husi rai estadu. “Labele uza fali sistema radikál para mai hasai, halo ema hotu la satisfeitu," nia afirma.

Tuir Silveiro, bainhira Governu hasai komunidade tenke ho dignu. Atu nune'e, komunidade labele sai vítima ba prosesu dezenvolvimentu ne'ebé la'o iha rai laran.

Entretantu, reprezentante Diresaun Sistema Nasionál Cadastro (SNC), Felicidade M. Ximenes afirma, iha prosesu atualizasaun ida ne'e atu fahe informasaun kadastrál anteriór nian ba komunidade sira.

"Ohin ami mai fó informasaun ba komunidade sira iha Suku Madohi, Posto Administrativu Don Aleixo. Liuliu iha Aldeia tolu hanesan Anin Fuik, 7 de Setembro no Rosário ne'ebé hela iha rai estadu nian, atu bele halo registrasaun hodi estadu bele hatene uma-kain hira mak durante ne'e okupa," Felicidade hateten.

Ho ida ne'e, tuir Felicidade, prosesu alargamentu ba Aeroporto ne'e la'o, sei hasai populasaun sira ne'ebé okupa rai refere tuir lei no sistema ne'ebé iha ona.

Maski nune'e, komunidade sira ne'ebé hetan afetadu husi rai estadu, seidauk klaru tanba foin mak halo prosesu rejistrasaun.

Page 1 of 12

.

Contact us

Palapasu
Dili, Timor-Leste
+670 7723 4852
+670 7728 1698
https://www.tempotimor.com