Tempotimor (Dili) - Proposta Governu ba alterasaun Lei Orsamentu Jestaun Finanseira (LOFJ) ho karakter urjénsia la pasa iha Parlamentu Nasionál ho votu kontra husi bankada CNRT 21, KHUNTO 5, PD 4, FM 1, UDT 1 no PUDD 1 hodi nune’e total votus kontra 33 no afavór 31 mai husi bankada FRETILIN 23, PLP nain 7 no Deputadu Guntur Falta no afavor ida husi PD. 

Tempotimor (Dili) - Parlamentu Nasionál, iha Segunda (23/3), kansela votasaun ba alterasaun Lei Jestaun Finanseiru tanba ahi mate bainhira atu halo votasaun.

Tempotimor (Dili)-Prezidente Bankada partidu CNRT iha Parlamentu Nasional Duarte Nunes hatete, FRETILIN no PLP iha direitu atu asina entendimentu ka forma aliansa.

Tempotimor (Dili) - Partidu Frente Revolucionário Timor-Leste Independente (FRETILIN) no Partidu Libertasaun Populár (PLP) fiar aan atu hetan solusaun hakotu impase politika no forma IX Governu hafoin asina nota entendementu.

Tempotimor (Dili) - Partidu Frente Revolusionáriu Timor-Leste Independente (FRETILIN) no Partidu Libertasaun Populár (PLP), Sabadu (21/3), sei asina nota koligasaun foun, nu'udar solusaun ida ba hakotu impase polítika iha rai-laran.

Tempotimor (Dili)-Deputada husi bankada Fretilin, Maria Angelica Rangel husu ba deputadu sira iha Parlamentu Nasionál, liu-liu deputadu bankada CNRT, atu labele halo retorika hodi duun sala hotu ba governu.

Tempotimor (Dili)-Bankada Partidu Libertasaun Popular (PLP) iha Parlamentu Nasionál konsidera koligasaun foun ne'ebé lidera husi partidu CNRT tenta atu halo golpe ba estadu.

Tempotimor (Dili) - Liuhusi konferénsia nasionál Partidu Congresso Nacional Reconstrução Timor-Leste (CNRT) deklara atu mantein nafatin koligasaun Aliansa Mudansa ba Progresu (AMP), maibé aliansa foun ne'e esklui Partidu Libertasaun Populár (PLP).

Tempotimor (Dili)-Titlu no kontiudu husi notisia ne'ebé públika sai nu'udar direitu fundamental kada redasaun instituisaun media hodi deside. Titlu husi notisia ne'ebé interesante sai mós nu'udar asuntu ida ne'ebé parte redasaun presiza haree. Utulizasaun kotasaun ("..") sai nu'udar buat baibain ne'ebé media ohin loron uza iha sira-nia titlu no kontiudu notisia.

Kotasaun ne'ebé media sira uza iha nia notisia, liu-liu iha titlu, ba lia-fuan ida ka liu la'os de'it ho intensaun atu titlu notisia refere sai interesante, maibé bele mós amostra situasaun ka kondisaun ida ne'ebé fonte informasaun la konsege hato'o, ka nu'udar lia satira ida.

Notisia ne'ebé media online tempotimor.com públika iha Sesta (06/03) sai "kontra-versaun" tanba nia titlu ne'ebé uza kotasaun. Iha notisia refere tempotimor.com hakerek, "La Prense Rekezitus, PR Lu-Olo 'Duni' Fila Xanana". Ikus mai, lia-fuan "Duni" sai diskusaun no hamosu pro no kontra.

Esplikasaun badak husi lia-fuan "DUNI" ne'ebé habit ho kotasaun rua la'os signifika katak PR Lu Olo duni fila Xanana. Ezemplu, bainhira mane ida hakarak ba hafolin feto, maibé to'o iha feto nia uma, mane ne'e la lori buat ne'ebé feto nia familia hakarak, ho nune'e feto nia familia haruka nia fila hodi kompleta. HARUKA fila bele interpreta mós ba lia-fuan DUNI ho kotasaun, katak haruka fila hanesan mós DUNI fila ho didi'ak, ho mamar.

Fila fali ba titlu notisia tempotimor.com, "DUNI" ho kotasaun signifika mós katak PR Lu Olo haruka fila Xanana hodi bele priense rekezitus balun ne'ebé presiza kompleta.

Relasiona ho titlu tempotimor.com ne'e, deputada husi bankada CNRT Maria Barreto deklara, titlu notisia ne'ebé tempotimor.com públika kontraversaun no hamosu polemika hodi sora lider sira.

"Titulu 'La Priense Rekezitus, PR Lu-Olo 'Duni' Fila Xanana'", ida ne'e soran lider nasional sira, maibé lee iha konteudu notisia la mensiona kona-ba PR Lu-Olo duni fila Xanana," dehan deputada ne'e iha Parlamentu Nasionál, Segunda (09/03).

Tuir nia, notisia ne'ebé tempotimor.com públika la kredibel no la tuir faktus tanba titlu notisia ne'ebé kontradis ho kontiudu informasaun.

"Ha'u lee ba titlu ida ne'e hatudu jornal tempotimor la garante integridade ho kredibilidade ba notisia," dehan deputada Maria ne'ebé la konsege halo diferensia entre jornal ho media online hodi temi tempotimor.com nu'udar jornal..

Liu tan, deputada ne'e dehan, notisia ne'ebé tempotimor hatuun kontra kodigu etika jornalista nian ne'ebé loloos defende ema hotu nia direitu ba informasaun ne'ebé loos no iha onestidade, imparsial no independente.

"Jornalista tempotimor ida hakerek ne'e kontra kodigu etika, sai fali provokator, mau soran, inventadu i manipula informasaun falsu hodi lansa ba públiku," dehan nia ho lian aas.

Maria dehan, titlu ne'ebé media online tempotimor.com hakerek nakonu ho odiu vigansa politika, tan ne'e, jornalista ne'ebé hakerek notisia ne'e la serve lori titlu

Titulu ne'e hatudu momos katak, jornalista nakonu ho odiu vigansa politika no nia la serve sai jornalista.

Ho kestaun hirak ne'e, deputada husu ba Sekretariu Estadu Komunikasaun Sosial no Konsellu Imprensa atu bele tau atensaun no husu tempotimor.com responsabiliza ba ninia notisia refere.

"Ha'u hakarak husu seriedade ba Konselu Imprensa par oinsa atu bele tau atensaun ba media hirak ne'ebé sai provokator no inventadór, sira ne'e di'ak liu hapara," dehan nia.

"Haluha An Rasik"

Entretantu, deputadu Partidu Libertasaun Popular (PLP) Francisco Vasconcelhos defende públikasaun tempotimor.com.

Tan ne'e, nia husu ba deputadu sira atu labele koko hodi kontrola media sira.

Deputadu ne'e fó ezemplu ba kritika sira ne'ebé media iha nasaun sira seluk hanesan Amerika halo ba nia lider sira.

"Iha Amerika jornalista sira sei kritika Donald Trump, hanesan mos iha konferensia ida iha Malazia kona-ba oapel parlamentu nian hodi buka solusaun ba problema Palestina nian, profesor doutor mai barak ko'alia kona-ba Donald Trump hanesan Hitler, ne'e hatudu saida? Se ida nia (ema ne'ebé koalia) sente la di'ak tenke ko'alia, ne'ebe tempotimor no kualker jornal bele espresa, importante labele insulta".

"Ha'u justru preokupa media center CNRT nian mak soran liu. Horseik ko'alia de'it kona-ba PLP haruka ami lee fali akta, ne'e soran ka lae? Ha'u akompania hela dei't, ha'u preokupa ita labele insulta, ne'e bele, ami PLP mós iha media center mais ami sempre dehan labele ataka partidu no lider," dehan Francisco.

Nia dehan, dala-barak nia haree media center CNRT hasai informasaun ne'ebé la edukativu.

"Ita labele ko'alia ida pois ida fali ita ignora, ne'e la loos.

Governu Labele Intervene

Sekretariu Estadu Komunikasaun Sosial Mericio Juvinal dos Reis 'Akara' hatan katak, governu fó apoiu orsamentu ba Konselu Imprensa atu sira hala'o knar no serbisu hodi haree ba serbisu media sira iha Timor Leste.

Nia hatete, tuir Lei Komunikasaun Sosial no mós Konstituisaun RDTL governu labele halo intervensaun direita, liu-liu ba iha editorial.

"Ita akompana media balun karik ladun halo notisia tuir estandar kodigu etika jornalista nian ne'e ita husik ba Konselu Imprensa mak haree, tanba ita mós lakohi ba oin ki'ik boot governu mak halo intervensaun, ne'ebé ami akompaña, sei informa de'it ba Konsellu Imprensa hodi hala'o knar di'ak liu tan," dehan Akara.

Nia afirma, governu asegura no garantia liberdade imprensa no liberdade espresaun ne'ebé konstituisaun garantia no Lei Komunikasaun Sosial fó dalan.

Tempotimor (Dili) - Primeiru Ministru, Taur Matan Ruak hatete, atu luta ba nasaun nia diak, prontu dehan la'e ba lider istoriku Kay Rala Xanana Gusmao kuandu hare bu'at ruma la los.