Tempotimor (Ermera)-Sekretáriu Estadu Kooperativa (SEKoop), Elizario Ferreira, husu ba dirijente kooperativa sira tenke sai Lalenok ba membru sira iha kooperativa nia laran.

Tempotimor (Ermera)-Sekretáriu Estadu Kooperativa (SEKoop), Elizario Ferreira, husu ba dirijente kooperativa sira hotu atu atividade tenke hakraik-an.

Tempotimor (Ermera)-Sekretáriu Estadu Kooperativa (SEKoop), Elizário Ferreira, esplika prosesu hari’i kooperativa ba komunidade iha suku Ailelo, Postu Administrativu Hatulia, Munisípiu Ermera.

Tempotimor (Dili)-Kooperativa Grupu Haburas husu ba Governu atu kria kondisaun merkadu iha Postu Admnistrativu Maubessi, Munisípiu Ainaro ba produsaun ai-han.

Tempotimor (Baukau)-Prezidente Kooperativa Crédito Uniaun- Loron Matan São José (CU-LMSJ), Pe. Mário de Carvalho Soares, hatete Kooperativa CU-LMSJ uza ona aplikasaun Sistema Informátika Crédito Uniaun (SICU) hodi atende kliente sira.

Tempotimor (Likisá)-Prezidente Autoridade Munisípiu (PAM) Likisá, Pedro Paulo Gomes, husu ba veteranu sira liuhusi Conselho Combatentes Limbertaçăo Nacional (CCLN), atu luta ba dezenvolvimentu kooperativa.

Tempotimor (Ainaru)-Kooperativa Crédito Uniăo-Maubisse Hanoin Ba Futuru (CU-MHBF) husu Sekretária Estadu Kooperativa (SEKoop) fasilita formasaun hodi hasa'e kapasidade membru sira-nian.

"Ami Crédito Uniăo Maubisse Hanoin ba Futuru, husu ba governu liliu ba SEKoop atu akompaña ami hasa'e dirijete no membru sira hodi bele iha koñesimentu kona-ba lala'ok kréditu uniaun ne'ebé di'ak, atu nune'e ami bele dezenvolve kréditu uniaun ida ne'e sei sai forte no sustentável”, dehan Prezidente Kooperativa, CU-MHBF, Luciano Mendonça Nunes, iha salaun Administrasaun Postu Administrativu Maubisse Villa, sábadu (10/07).

Dezafiu ne'ebé membru sira hasoru durante seidauk iha sede ne'ebé mak permanente, kapasitasaun mínimu, difikulta kapasidade membru no dirijente no membru sira.

"Fasilidade eskritóriu sei menus, hanesan komputadór, printer, meza, kadeira, nomós armáriu no sira seluk. Tuir fali, ami seidauk iha transporte ne'ebé mak bele fasilita ba halo servisu ne'ebé di'ak. Aleinde ne'e, seidauk iha kapasidade atu akumula hotu populasaun Maubisse. Ami mós sei menus staff atu servisu halo atendimentu ba membru sira”, informa nia.

Kooperativa CU Maubisse Hanoin ba Futuru, hari'i iha 2013 to'o (31/06/2021) ne'e, akumula ona membru hamutuk 916, kompostu husi feto 548 no mane 368.

"Montante osan ne'ebé mak durante ne'e ami iha US$276,963,34, ida ne'e mak rendimentu ne'ebé durante ne'e ami iha”, dehan nia.

Entrentantu Sekretáriu Estadu Kooperativa (SEKoop), Elizário Ferreira, husu ba dirijente kooperativa atu hato'o pedidu ba SEKoop, nune'e bele hetan apoiu tuir konteúdu proposta ne’ebé hato'o ona.

"Ha'u promete tiha ba imi ona, ne'ebé imi-nia proposta ba asuntu tolu, halo pedidu formasaun, ho sede depois mak ekipamentu. Tanba sede iha mak tau imi-nia ekipamentu, sé sede laiha atu tau saida ba”, dehan Elizário.

Husu mós ba dirijente no membru sira halo servisu ne'ebé ho onestu ba malu, nune'e bele asegura kooperativa nia sustentábilidade ba futuru. (*)

Tempotimor (Dili)-Sekretária Estadu Kooperativa (SEKoop), rejista ona movimentu kooperativa hamutuk 117 iha Timor-Leste (TL).

Sekretária Estadu Koopertaiva (SEKoop), Elizário Ferreira hatete, tuir lei kooperativa sira ne’ebé hari'i, tenke rejista iha Ministériu Justisa (MJ) nomós iha baze de dadus SEKoop nian.

“Kooperativa kréditu ne'e iha 71 kooperativa, e kooperativa de produsaun ne'e 36, ho totál hamutuk 117 kooperativa ne'ebé mak eziste iha Timor-Leste”, dehan Elizário iha Akait, segunda (03/05).

Sekretáriu Estadu Elizário ne’ebé asume kna'ar iha SEKoop durante fulan sanulu konsege reativa kooperativa hamutuk 60 resin, no instala kooperativa hamutuk 33 iha postu administrativu sira, no tuir planu, tinan 2021 hari'i tan kooperativa 32, nune'e bele perkore ona ba postu administrativu hamutuk 65.

“Planu sekretária de estadu kooperativa nian ne'e, hanoin katak tinan ida ne'e atu kompleta 65 sub distritu ne'e, maibé ita sempre hetan bebeik interkalasaun husi konfinamentu, entaun ita haree para oinsá atu integra atividade sira ne'e ba oin”, afirma nia.

Ba movimentu kooperativa sira eziste ona, maibé dala-ruma difísil dezenvolve-an, SEKoop sei kontinua promove programa formasaun, edukasaun no informasaun ba membru no dirijente sira, nune'e bele hametin sustentábilidade ba futuru. (*)

Tempotimor (Dili)-Sekretária Estadu Kooperativa (SEKoop) liuhusi Diresaun Nasionál Kooperativa Produsaun Integradu (DNCPI-sgla portugés) introduz lala’ok kooperativa ba juventude kreativu Grupu Knua Indústria Kréditu no Formasaun (KIK & F) hodi aumenta koñesimentu.

Diretora DNCPI, Jacinta dos Santos esplika, formasaun ne'e' hala'o tanba pedidu mai husi grupu juventude sira atubele kapasita sira-nia aan kona-ba lala'ok kooperativa liuhusi formasaun.

Joventude kreativu sira ne'e iha kapasidade no iha poténsia atu halo ai-han lokál liuliu batar kinur ne’ebé sira transforma ba halo kripik.

"Sira ne'e foin mak halibur-an atu halo atividade ida ne'e, maibé tanba sira hanoin atu grupu de'it, sira sente ida ne'e ladún di'ak. Sira hakarak atu inklina aan iha kooperativa. Tanba ne'e mak sira hakarak atu mai aprende lala’ok kooperativa ne'e oinsá", hatete Jacinta iha Federasaun Hanai Malu (FHM), Lanud Bairropite, kuarta (28/04).

Ho formasaun ne'e hala'o durante loron haat, bainhira remata mak sira sente iha kapasidade naton ona bele deside hari'i kooperativa.

"Sé ida ne'e mak sira sente di'ak, katak provizóriu sira nia hanoin kooperativa mak di'ak liu. Entaun, sira hakarak atu mai hatene didi'ak lala'ok kooperativa, ninia legalidade oinsá atu nune'e sira bele hari'i kooperativa", dehan nia.

Formadór SEKoop, Sancho António da Costa Ximenes haktuir, matéria ne'ebé ko'alia iha formasaun kona-ba identidade kooperativa, oinsá bele hatene kona-ba lala'ok kooperativa nian.

"Entaun, iha ne'ebá ami ko'alia kona-ba definisaun kooperativa, valor sira, no filozofia kooperativa. Ida ne'e mak ami ko'alia bá grupu kreatividade ne'e", informa nia.

Koordenadór grupu Knua Industria Kréditu no Formasaun (KIK & F), Octaviano da Costa dehan, objetivu sira tuir formasaun ne'e, tanba sira planeia atu bele hari'i kooperativa produsaun iha futuru.

"Ami atu aprende klean liután kona-ba lala'ok kooperativa nian. Ami sira ne'e kompostu husi joven hotu kedan, ami iha inisiativa rasik atu hari'i kooperativa ida ho ramu bá kooperativa produsaun nian", nia esplika.

Grupu Juventude ne'e kompostu husi membru na'in-21, iha atividade la'o durante tinan ona foka liuba produsaun. (*)