Tempotimor (Dili)-Governu Japaun asina ona nota ho Governu Timor-Leste hodi bele apoiu fundu millaun US$44 ho gratuitu ba konstrusaun terminál foun ba Aeroportu Internasionál Prezidente Nicolau Lobato (AIPNL).

Tempotimor (Dili)-Governu Japaun liuhusi embaixada iha Timor-Leste apoiu tan vasina AstraZeneca doze hamutuk rihun-168 (168.000) ba Governu Timor-Leste hodi kompleta vasina ba populasaun sira hotu.

“Governu Japonez oferese ona asisténsia oioin hodi suporta ita-boot sira-nia luta hasoru covid-19. Ohin loron, vasinas AstraZeneca ne'ebé produz husi Japaun, ho montante kuaze dozes rihun-170 to'o iha ne'e”, haktuir Embaixadór Japaun, Masami Kinefuchi, durante diskursu iha serimónia entrega vasina iha salaun MNEK, Praia dos Coqueiros, segunda (16/08).

Apoiu vasina hirak ne'e nu'udár parte husi promesa ne'ebé sira-nia Primeiru Ministru hato’o iha Japaun, bainhira nia konvola reuniaun Vasina husi Japaun Covax hamutuk ho GAVI.

“Ha'u espera katak, fornesimentu adisionál vasinas husi Japaun, ne'e sei kontribui hodi halo kama’an situasaun pandemia iha pais ida ne'e. Hamutuk ita forte, fahe malu ita monu. Ida ne'e mak pais ida ne'e aprova ona iha ninia istória no kontinua sai hanesan matadalan importante ida iha tinan barak ne'ebé sei mai. Ida ne'e sai mós realidade indiskutivel ba ita hotu iha mundu globalizadu ida ne'e”, hateten nia.

Primeiru Ministru (PM), Taur Matan Ruak hatete, doasaun Governu, povu Japaun nian, Timor-Leste simu ona vasina hamutuk rihun-982,380, no iha númeru ida ne’e, Covax fó 1800, Nova Zelándia rihun-24, Xina rihun-100, Austrália 577,580, Portugal iha apoiu rihun-12, no Japaun apoiu vasina hamutuk rihun-168.

“Tanba ne'e, señor embaixadór (Japaun), ha'u hakarak lori hau-nia naran rasik, lori povu Timor nia naran, agradese ita-boot sira esforsu tomak, no liuhusi ita-boot, agradese señor Primeiru Ministru, Japaun no povu Japaun, ba jenerózidade ne'ebé fó kontribuisaun ho vasina para bele salva vida iha ami-nia rain. Ha'u-nia agradesimentu espesiál, ba organizasaun mundial saúde ho inisiál ne'ebé halo esforsu ho difikuldades boot, mais lori vasina ne'e to'o iha Timor”, dehan Taur. (*)