Diretór Nasionál Planeamentu no Programa (DNPP), Tómas Gusmão informa, durante ne'e Kooperativa hamutuk 26 mak kompleta ona dokumentu hodi ba rejistu iha Notariadu sai hanesan organizasaun legál ida.

“Kooperativa sira ne'e rejistu ona iha Notariadu ne'e hamutuk 26. Ha'u hanoin kooperativa sira ne'ebé mak ba rejista ona iha diresaun Nasionál Notariadu ne'e nia objetivu sira-nia funsaun hanesan organizasaun ida, tanba kualker organizasaun iha Timor-Leste eziste ne'e tenke ba rejistu iha Notariadu, atubele hetan ninia lisensa nu'udar organizasaun ida, ne'ebé ba Notariadu ne'e kaulker organizasaun ida ka Kooperativa ida ka partidu polítika ka empreza ida” dehan nia ba www.tempotimor.com iha nia kna’ar fatin Bairopité, tersa (22/02).

Kooperativa sira ne'ebé ba rejistu iha Notariadu sira atu sai organizasaun ida tanba iha lisensa atu halo kualker atividade ne'ebé legalizadu.

Ba Kooperativa 26 ne'ebé rejista ona hamutuk ne'e Kooperativa oioin, mak hanesan Kooperativa Kréditu Uniaun, Kooperativa produsaun no Multisetorál.

“Ha'u hanoin kahur malu, barak liu mak Kréditu Uniaun, tuir mai multisetorál, no balun iha produsaun”, informa nia.

Antes Kooperativa ida atu ba rejista iha Notariadu atu SEKOOP revé tiha dokumentu sira mak hafoin lori ba diresaun Nasionál Notariadu.

“Sira mai verifika tiha lai iha diresaun Planeamentu iha departamentu rejistu e verifikasaun, tenke verifika tiha lai sira-nia dokumentu sira ne'e, kuandu prense ona rekézitu mak ami foin halo Rekomenda e sira lori ba Notariadu hodi hetan legalidade”, esplika nia. (*)