“Ita apoiu emerjénsia ba vítima sira hotu ona, maibé hela 2 mil etal mak seidauk hetan rekuperasaun, tanba orsamentu iha tinan 2021 nia la to’o no sasán sira iha armajen mós hotu, maibé iha tinan ne’e ita tau ona osan ita sei apoiu hotu”, dehan Joaquin José, iha edifísiu SEPS, Kaikoli, tersa (22/02).
Ba vítima 04 Abril sira iha uma hetan estragu totál ho kma’an hamutuk rihun-5 familia mak afetadu, maibé Governu apoiu ona rihun-3 hela rihun-2 seidauk hetan apoiu rekooperasaun.
“Tanba ne’e iha tinan ne’e ita tau ona osan atu apoiu rekuperasun vítima afetadu sira hamutuk 2 mil iha teritóriu Timor laran, iklui iha Munisípiu Manatutu”, esplika nia.
Ba Vítima sira ne'ebé seidauk hetan apoiu rekuperasaun, dadaun ekipa rejista hotu ona iha sistema, tempu badak sei apoiu sasán hodi hadi'a fatin uma sira ne'ebé durante hetan estragu.
“Viítima ita rejista hotu ona iha sistema ba sira ne’ebé seidauk hetan apoiu husi Governu tanba, stok sasán sira iha armajem hotu, tanba ne’e ita tau ona osan iha tinan 2022 sei rezolve hotu agora”, hatete nia.
Nune’e, ekipa SEPS halo ona akizasaun hodi sosa materiál atu apoiu rekupersaun ba vítima sira ne'ebé mak seidauk hetan apoiu durante dezastre naturál.
“Durante ita halo intevensaun ida imediata ba vítima sira ho lalais, maibé limitasun osamentu la to’o, ita aloka ona ba vítima sira hamutuk 3 mil de’it, maibé sira ne’ebé uma hetan estragu ne’e hamutuk 5 mil, tanba ne’e hela 2 mil mak seidauk hetan apoiu rekuperasaun”, deklara nia. (*)