“Ami halo reuniaun bilateral, rejionál no multilaterál, inklui kona-ba Covid-19, nomós kooperasaun ekonomia entre Timor-Leste ho Austrália. Depois ami asina Pacific Australia Labour Mobility (PALM) kona-ba Seasonal Worker Program (SWP)”, informa Ministra Adaljiza, iha Aeroportu Internasionál Prezidente Nicolao Lobato, kuarta (16/02).

Ba Memorandum of Understanding (MuO) foun ne’ebé asina bele fó oportunidade ba timoroan sira ba hela iha Austrália husi fulan ualu (8), to'o tinan haat (4).

“Oportunidade ne'e ha'u ba vizita Griffith, ne'ebé timoroan na'in-sanolu-resin-hitu (17) servisu iha ne'ebá, tanba news ABC nian sira halo notísia ida ke pozitivu, kona-ba tós na'in ne'ebé kontente tebetebes ho servisu timoroan sira-nian”, esplika nia.

Tanba Timoroan sira ne’ebé servisu iha fatin refere nunka kolen, ho dedikadu maka’as ho komportamentu di'ak tebes la halo problema.

Iha vizita ne’ebé halo tuir lolos Primeiru Ministru, Taur Matan Ruak iha ajenda, maibé teste PCR ne’ebé halo hatudu rezultadu pozitivu, tanba ne’e kansela viajen.

“Ha'u kontinua ho vizita iha ne'ebá, ajenda ne'e importante tebes ba Timor-Leste tenke ba partisipa”, dehan nia. (*)