“Ohin ne'e, mak atu oinsá parte husi Governu no família hodi assina deklarasaun atu sai hanesan komitmentu ida katak inan aman no família prontu ona husik sira-nia oan, la’en husi sira-nia le'et atu ba servisu iha ema nia rain. La'ós Governu mak obriga maibé Governu kria kondisaun de'it, oportunidade ne'e traballadór sira mak aproveita”, dehan Diretór Nasionál Empregu Exterior, Filomeno Soares, iha Salaun DNEE, Bekora, kuarta (16/02).

Maibé atu aproveita oportunidade sira ne'e, traballadór sira tenke kumpri rekezitu balun hodi asegura sira, bainhira servisu iha Korea Súl.

Tanba prosesu haruka traballu sira ba servisu iha rai liur la'ós fasil, maibé liuhusi prosesu ne'ebé naruk. Nune'e husu traballadór ne'ebé hetan ona oportunidade atu aproveita ho di'ak.

“Traballadór sira ne’ebé atu aranka ba Korea Súl ho totál 58 Pesoál, traballadór sira nee’ sei destaka ba área 2 hanesan Peskas ba 31 pesóal no área fábrika 27 pesóal. Traballadór sira ne’e sei ba Korea Súl iha Loron Sexta dia 18 Fevereiru semana ne'e”, hatete nia.

Tanba ne’e família ka inan aman ne'ebé lakoi atu sira-nia família ka oan ba servisu iha rai liur labele asina deklarasaun ne'ebé prepara ona husi Governu.

Reprezentante Inan Aman Traballadór Timoroan nian, Domingas Godinho agradese no kontete tebes ba planu Governu nian ne'ebé fó ona oportunidade ba sira-nia oan bele ba servisu iha Korea Súl.

“Hanesan inan aman, ami agradese no orgullu tanba ho moris no situasaun ida agora ne'e difísil tebes ba osan. Tanba ne'e ami agradese tebes ba Governu nia planu ne'ebé haruka ami-nia oan sira ba servisu iha rai liur”, afirma nia.

Maibé husu mós traballadór sira atu servisu tuir kultura iha Korea Súl no kumpri regra ne'ebé mak implementa, nune'e bele fila hamutuk ho família bainhira kontratu termina. (*)