Inan Feton Kbi'it Laek, Joana Camoes ‘Bisoi’ durante tinan barak moris nu’udar difisiénsia liman no ain ne’ebé laiha família no tinan barak hala’o de’it atividade fa’an kulusaun no sumasu ne’ebé nia rasik prodúz ho ailele hodi fa’an ba komunidade sira.

Uma ne’e halo ho medida 5x6 ho kuarta rua, sala vizita ida, sala hán fatin ida kompleta ho fasilidade, toba fatin, armáriu, kadeira no meza inklui dapur.

Serimónia entrega uma ba inan feot kbi'it la'ek ne'e hetan bensaun husi Padre Vigáriu Parokia Nossa senhora Assunção Same, Fernando da Silva.

Hafoin simu prezente ne'e, Joana Camoes ‘Bisoi’ ho matawen hodi hato’o agradesse ba prezente furak ne'ebé sei sai hanesan mahon ida ba nia hodi hela ho dignu.

“Ha’u agradese ba Maun Key hodi tulun ona ha’u halo uma ne’e, ha’u foin sente hetan naroman ida, hodi halo ha’u kontente ho tanis hodi simu uma ida ne’e”, dehan Joana Camões ‘Bisoi’ ho matawen iha Aldeia, Sisurai-Same, segunda (14/02).

Ho tulun ne'ebé mak Joana Camoes hetan maske selu labele, maibé sei hasa’e orasaun ba Na’i Maromak hodi fó bensaun no kbi’it liután ba Key Xavier hodi hatutan nia domin ba hirak ne’ebé presiza tebes.

Premiadu Nobel da Paz, José Ramos Horta ne’ebé sai sasin ba serimónia importante ne’e, hato’o parabéns ba Key Xavier ne'ebé mak ho nia vontade tomak hodi lolo liman ba povu kbi'it laek sira.

“Ha’u agradese ba Key Xavier ho nia família sira hodi halo asaun ne’e, nu’udar modelu ida ita tenke halo tuir, tanba asaun importante tebes, tanba iha tinan 2020 Key ho Maun Boot Xanana no Timoroan barak ajuda ona ema barak iha Timor laran tomak”, dehan Horta.

Durante fulan-maiu 2020, Xanana Gusmão ho emprezáriu Timoroan no empezáriu Xineza sira entrega no fahe mós foos kuaze rihun-10 liu ho ekipamentu desportu Timoroan sira iha munisípiu hothotu.

Atu hadi'a kbi’it la'ek sira-nia moris di'ak, maka Kandidatu Prezidente Repúblika ne’e promete sei kontinua dere embaixadór dezignadu iha Timor-Leste atu halo mós asaun tulun ne’e ba kbi’it la’ek sira.

Diretór Kompaña Badfor Lda, Key Xavier konsidera asaun karidade halo uma ba kbi'it la'ek sira ne'e, nu’udar kontinuasaun husi programa “Lolo Liman ba Kbi'it La'ek Ne'ebé Presiza” ne’ebé hala’o antes ona hamutuk ho Kay Rala Xanana Gusmão iha tinan 2020 no to'o agora sei kontinua.

Key halo uma ne’e, hafoin hetan informasaun husi jornalista sira ne’ebé públika lala'ok moris inan feton ne’e iha mídia.

“Ha’u haree jornalista sira aprezenta inan ne’e nia problema, tanba ne’e ha’u mai haree direita ajuda tuir ha’u nia kbi'it”, dehan nia.

Key konsidera papél jornalista importante mós, tanba la’ós hala’o de’it atividade koberutra ba situasaun politika, maibé halo mós kobertura ba asuntu sosiál ne’ebé liga ho problema sosiál povu nian.

“Ha’u-nia fuan triste tebes, bainhira ha’u mai haree Tia Bisoi nia uma, nia moris susar tebes, iha tempu ne’ebé, ha’u hanoin tebes hodi buka mai hadi'a kedas uma ne’e no ohin ita hamutuk mai entrega kedas uma ne’e loron domin ho ne’ebé ema hotu iha mundu tomak no ita Timor-Leste mós selebra ho Avó José Ramos Horta liuhusi entrega uma ne’e”, esplika nia.

Tanba ne'e, agradese mós ba autoridade suku, juventude no komunidade ne’ebé apoiu servisu kontrusaun uma ne’e to'o remata.

Adjuntu Administradór Munisípiu Manufahi, Filomeno Amaral, apresia ho asaun karitativa ne’ebé hala’o mós iha loron importante ne’ebé mundu tomak no povu Timor-Leste selebra loron domin nian.

“Uma dignu ida ne’e, nu’udar onra ho solok tebes, tanba ami agradese ba Maun Ramos Horta no Maun Key hodi oferece uma ida ne’e. Key Xavier ema ne’ebé hatudu nia domin no laran luak, ami hatene Key halo ona uma barak iha fatin barak, ne’e tanba domin ne’ebé boot tebes mai husi nia neon no laran”, agradese nia.

Ho ajudu ne'ebé mak emprezáriu halo ba ema ne’ebé presiza ne'e nu’udar asaun importante atu bele kari domin ba ema ne’ebé presiza tebes.

Dadauk, iha munisípiu Manufahi, Governu liuhusi Programa Dezenvolvimentu Nasionál Suku (PDNS) mós prepara ona osan tokon $4 hodi konstrui uma kbi'it la'ek ba povu sira ne’ebé autoridade Manufahi identifika ona.

Xefe Suku Betanu, Filipe de Araújo, agradese ba Premiadu Nobel da Paz Jose Ramos Horta ho Timoroan Key Xavier ne'ebé entrega uma ba ninia populasaun.

Autoridade suku ne’e, espera emprezáriu Timoran sira ne’ebé iha kbi'it bele hatutan programa ne’e iha Manufahi tomak hodi ajuda povu sai husi mukit. (*)