Diretór Diresaun Nasionál Empregu Exteriór, Filomeno Soares hatete, formasaun Pre-Departure Briefing ne’ebé hala'o atu fahe informasaun kona-ba regulamentu no disiplina iha Austrália.

"Disiplina servisu, kultura servisu, no regulamentu balun ne’ebé nasaun Austrália iha, nune’e antes traballadór tama ba servisu sira bele kompriende ona”, dehan nia hafoin formasaun Pre-Departure Briefing iha salaun STVJ, Bekora-Kamea, sesta (28/01).

Ho ida ne’e, husu ba kandidatu traballadór sira atubele aproveita didi’ak oportunidade ne’e hodi aprende, tanba regulamentu, kultura, no disiplina servisu iha Austrália, la-hanesan ho nasaun Timor-Leste.  

Traballadór sira ne’ebé ba servisu iha Austrália, ne'e hanesan oportunidade ida, atu labele ses-an husi sistema, hatudu komportamentu servisu ne’ebé di’ak, hodi loke dalan ba empregadór sira oinsá mak emprega tán joven Timoroan rihun-sanulu-resin-lima iha sistema baze-de-dadus SEFOPE ni’an.

Ba totál traballadór na’in-21 ne’e, feto 6 no mane 15, ne’ebé tuir planu na'in-10 sei aranka uluk iha loron 15 fevereiru, ba servisu iha kompaña ADCO, no na'in-11 sei aranka iha loron 16 fevereiru 2022, ba servisu iha kompaña Burlington. (*)