Login to your account

Username *
Password *
Remember Me

Fahi Mate Mohu, MAP Seidauk Hatene Fahi Moras Saida

Fahi Timor ne'ebe komunidade sira hakiak Fahi Timor ne'ebe komunidade sira hakiak Foto Espesial

Tempotimor (Dili)-Komunidade nia fahi lubuk ida mak moras no mate ona maibé Ministériu Agrikultura no Peskas (MAP) seidauk bele halo asaun prevensaun tanba la hatene moras saida mak ataka fahi hirak ne'e.

Atu bele identifika moras ne'ebé animal sira sofre, MAP foin foti sampel no sei haruka ba Australia atu teste iha laboratóriu.

"Ita seidauk hatene moras fahi nian ne'e tanba diferente ho moras ne'ebé durante ne'e iha," dehan Ministru Agrikultura no Peska Joaquim Gusmao dos Reis Martins, Sesta (20/09).

Nia esplika, ekipa teknika MAP foti ona sampel no kontaktu ona ba laboratóriu iha Darwin hodi halo teste.

"Sira prontu simu atu halo teste, tanba ne'e ohin lae aban lori ona ba laboratóriu Darwin hodi teste, iha Timor seidauk iha laboratóriu propriadu atu teste, " dehan Ministru Joaquim.

Nia afirma, hafoin teste mak foin hatene moras ne'e mai husi ne'ebe no moras saida.

Iha inisiu fulan Setembru, komunidade nia fahi lubuk ida mak hetan ataka husi moras no la konsege atu kura.

"Moras fahi nian ne'e durante semana rua resin ona. Bainhira moras ona, fahi ne'e mate. Ha'u-nia fahi kuaze 20 resin mak mate ona,” informa Komunidade Aldeia 03, Suku Fatuhada, Dili, Raimundo da C. Pinto, Kinta (19/09).

Nia dehan, prosesu hakiak fahi ne'e naruk, gasta tempu no osan, tan ne'e bainhira MAP la halo asaun ruma sei fó impaktu mós ba sira-nia moris.

Tan ne'e, Raimundo husu ba parte ne'ebé halo kontrolu ba animal atu bele halo prevensaun lalais ba fahi sira ne'ebe moras.

“Se lae fulan ida ka rua tan mai, fahi ne'e mate estraga hotu,” dehan nia.

Komunidade seluk ne'ebé hela iha eis Merkadu Komoro, Aurelia da Silva hatete, fahi moras nee kleur ona, maibé MAP seidauk halo asaun ruma.

“Ami husu ba ekipa MAP nian atu tuun mai hodi kura no halo prevensaun ba moras ne'ebé kona ami-nia animal,” nia husu.

Komunidade seluk ne'ebé hela iha area Tasi Tolu, Natalino Brito, informa, durante semana ida nia laran, nia fahi ualu (8) mak mate ona tanba moras.

“Ohin ida mate, aban ida mate tan, bainrua ida tan, ne'ebé lorloron mate troka malu de'it. Ami koko buka aimoruk hodi sona, maibé la konsege salva,” dehan nia.

Ba fahi hirak ne'ebé mate, Natalino dehan, nia deside hodi hakoi de'it tanba tauk moras husi fahi nee bele hadaet fali ba ema.

Entretantu, tuir informasaun ne'ebé tempotimor.com hetan, kazu fahi moras akontese kuaze iha kapital Dili tomak. Komunidade balun deside hodi oho ninia fahi hodi haan no faan bainhira fahi refere hatudu ona sintomu moras.

 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter